மழை நீரை சேமிக்க 500 இடங்களில் குட்டை

தமிழகத்தின், 17 மாவட்டங்களில், 500 பண்ணை குட்டைகள்
அமைப்பதில், வேளாண் துறையினர் தீவிரம் காட்டி வருகின்றனர்.

இதுகுறித்து, வேளாண் பொறியியல் துறை அதிகாரி ஒருவர்
கூறியதாவது:

பண்ணை குட்டைகள் அமைப்பதால், மழைநீரை சேமிக்கலாம்.
இந்த நீரை பயன்படுத்தி, மிளகாய், பருப்பு வகைகள்,
சிறுதானியங்களுக்கு பாசனம் செய்ய முடியும்.

இதை உணர்ந்து, நீர் பற்றாக்குறை உள்ள, 17 மாவட்டங்களில்,
மத்திய, மாநில அரசுகள் இணைந்து, 500 பண்ணை குட்டைகளை
அமைத்து வருகின்றன. ஒவ்வொரு குட்டைக்கும், 60 ஆயிரம்
ரூபாய் செலவிடப்படுகிறது.

குட்டைகள் ஒவ்வொன்றும், தலா, 26.50 அடி நீள, அகலம் மற்றும்,
5 அடி உயரத்தில் அமைகின்றன. ஒப்பந்ததாரர்கள் வாயிலாக,
இப்பணிகள் துவக்கப்பட்டுள்ளன. ஆறு மாதங்களில், பணிகளை
முடிக்க இலக்கு நிர்ணயிக்கப்பட்டுள்ளது. இவ்வாறு அவர்
கூறினார்.


- நமது நிருபர் -
வாரமலர்