சென்னையில் சாலை ஓரம் நின்றிருந்த காரை காயலான் கடையில் விற்ற போலீஸார்: உரிமையாளர் அதிர்ச்சி

திருவான்மியூரில் உரிமையாளர் ரிப்பேருக்காக விட்ட காரை,
ரெக்கவர் வேன் மூலம் கொண்டுசென்ற போலீஸார், யாரும்
உரிமை கோராததால் காயலான் கடையில் இரும்பு எடைக்கு
போட்டுள்ளனர்.


இது தொடர்பாக உரிமையாளர் அளித்த புகாரின் பேரில்
தற்போது உயர் அதிகாரிகள் விசாரணை நடத்தி வருகின்றனர்.


சென்னை அரும்பாக்கம் ரசாக் கார்டன் தெருவைச் சேர்ந்தவர்
ஷபீர் (32). இவர் கடந்த ஆண்டு போர்டு ஐகான்(TN 01 AL 6399)
கார் ஒன்றை விலைக்கு வாங்கியுள்ளார்.


காரில் சில பிரச்சினைகள் இருந்ததால் சரி செய்வதற்காக சிங்கார
வேலன் நகர், குப்பம் பீச் ரோடு, திருவான்மியூரில் மெக்கானிக் ஷெட்
வைத்திருக்கும் குப்புசாமி என்பவரிடம் மூன்று மாதம் முன்னர்
ரிப்பேருக்கு விட்டுள்ளார்.


காரை ரிப்பேருக்கு விட்ட சில நாட்களிலேயே உடல் நலம்
பாதிக்கப்பட்ட ஷபீர் மருத்துவமனையில் அனுமதிக்கப்பட்டதால்
எங்கும் வெளியில் செல்ல முடியாத நிலை ஏற்பட்டுள்ளது.


இந்நிலையில் காரை ரிப்பேருக்கு எடுத்த முனுசாமியும் காரை
தெருவில் நிறுத்தியிருந்ததால் திருவான்மியூர் போலீஸார் ரெக்கவர்
வேன் மூலம் காரை எடுத்து ஸ்டேஷனுக்கு கொண்டுசென்று விட்டனர்.


குப்புசாமி இதை கவனிக்கவில்லை. இந்நிலையில் உடல் நலம் தேறிய
ஷபீர் புதுப்பேட்டை வழியாக வந்தபோது அங்கு ஒரு இடத்தில் அவரது
காரை சிலர் உடைத்துக்கொண்டிருப்பதைப் பார்த்து என் கார் இது
எப்படி இங்கு வந்தது என்று கேட்டுள்ளார்.


ஆரம்பத்தில் பதில் சொல்லத் தயங்கியவர்கள் பின்னர் திருவான்மியூர்
காவல் நிலையத்திலிருந்து வாங்கி வந்ததாகக் கூறியுள்ளனர்.
இது குறித்து உடனடியாக மெக்கானிக் குப்புசாமியிடம் ஷபீர் விளக்கம்
கேட்க அவர் ஸ்டேஷனில் சென்று கேட்டுள்ளார்.


பின்னர் கார் உரிமையாளர் ஷபீர் காவல் நிலையத்தில் நிலையத்தில்
தனது காரை எடுத்துவந்த போலீஸார் காரை புதுப்பேட்டையில் பழைய
இரும்பு விலைக்கு (ரூ.25,000 க்கு) விற்று விட்டதாக புகார் அளித்துள்ளார்.


புகாரின் பேரில் அடையாறு துணை ஆணையர் ரோஹித் விசாரணை
நடத்தியதில் காரை விற்றது உறுதியானது.


இதையடுத்து திருவான்மியூர் காவல் நிலைய ஆய்வாளர், தலைமை
காவலர் ஆகியோரிடம் துணை ஆணையர் ரோஹித் விசாரணை
நடத்தி வருகிறார். தற்போது உரிமையாளரை சமாதானப்படுதும்
வேலையும், உரிய இழப்பீடு தருகிறோம் புகார் அளிக்க வேண்டாம்
என ஸ்டேஷன் தரப்பில் பேசுவதாகவும் கூறப்படுகிறது.


ஸ்டேஷனில் உள்ள மோட்டார் சைக்கிள்களை விற்பது வாடிக்கையாக
ஓரிரு இடங்களில் நடக்கிறது. ஆனால், காரையே விற்பது முதல்
முறையாக கேள்விப்படுகிறோம் என்று வியாபாரி ஒருவர் தெரிவித்தார்.


சில ஆண்டுகளுக்கு முன் கோயம்பேட்டில் உதவி ஆணையர் ஒருவர்
200-க்கும் மேற்பட்ட மோட்டார் சைக்கிள்களை விற்பனை செய்ததாக
சிக்கினார்.


அதன் பின்னர் தற்போது இந்த விவகாரம் வெளிவந்துள்ளது.
விசாரணையின் முடிவில் சம்பந்தப்பட்டவர்கள் மீது நடவடிக்கை
எடுக்க வாய்ப்புள்ளதாக போலீஸ் தரப்பில் கூறப்படுகிறது.
-
----------------------------
தி இந்து