உச்ச நீதிமன்றத்தில் அவமதிப்பு வழக்கு இன்று தாக்கல்: பொதுப்பணித் துறை செயலர் டெல்லி விரைந்தார்

காவிரி விவகாரத்தில் உச்ச நீதிமன்றத்தில் நீதிமன்ற அவமதிப்பு
வழக்கு தாக்கல் செய்வதற்காக, தமிழக அதிகாரிகள் நேற்று
டெல்லி சென்றனர்

உச்ச நீதிமன்றம் அளித்த 6 வார கெடுவுக்கு முன்னதாக,
தமிழக அரசு பிப்.22-ம் தேதி அனைத்து கட்சி கூட்டத்தை நடத்தி,
காவிரி மேலாண்மை வாரியம் அமைக்க பிரதமர் மோடியை
வலியுறுத்தி தீர்மானம் போட்டது.

தொடர்ந்து, மார்ச்.15-ல் நடந்த சட்டப்பேரவை சிறப்பு அமர்வில்,
காவிரி மேலாண்மை வாரியம் அமைப் பது குறித்து சிறப்பு
தீர்மானம் நிறைவேற்றப்பட்டு மத்திய அரசுக்கு அனுப்பப்பட்டது.

மேலும், காவிரி மேலாண்மை வாரியத்தை வலியுறுத்தி கடந்த
18 நாட்களாக நாடாளுமன்றமும் முடக்கப்பட்டது. அதிமுக
எம்பிக்கள் போராட்டம் நடத்திப் பார்த்தனர்.

இதற்கும் பிரதமர் மோடி எந்த நடவடிக்கையும் எடுக்கவில்லை.
இந்நிலையில், முதல்வர் கே.பழனிசாமி தலைமையில்
மார்ச் 29-ம் தேதி ஆலோசனைக் கூட்டம் நடந்தது. இக்கூட்டத்தில்,
நாளை சனிக்கிழமை, உச்ச நீதிமன்றத்தில் மத்திய அரசுக்கு
எதிராக நீதிமன்ற அவமதிப்பு வழக்கு தொடர முடிவெடுக்கப் பட்டது.

இதுதொடர்பாக நேற்று தமி ழக அமைச்சர் டி.ஜெயக்குமார்
கூறும்போது, ‘‘உச்ச நீதிமன்ற தீர்ப்பு என்பது தெளிவாக உள்ளது.
தீர்ப்பில் மேலாண்மை வாரியம், காவிரி நீர் முறைப்படுத்தும் குழு
என்பதுதான் குறிப்பிடப்பட்டுள்ளது.

எனவே, இதை எந்த வகையிலும் மாற்றக்கூடாது என்பதுதான்
எங்கள் நிலைப்பாடு. எனவே, மத்திய அரசு இவற்றை அமைக்காதது
குறித்து முறையிட உள்ளோம்’’ என்றார்.

இந்நிலையில், நேற்று இரவு, தமிழக அரசின் பொதுப்பணித்
துறைச் செயலர் எஸ்.கே.பிரபாகர், காவிரி தொழில்நுட்பக்குழு
தலைவர் ஆர்.சுப்பிரமணியன் டெல்லி புறப்பட்டனர்.

இன்று காலை உச்ச நீதிமன்றத்தில், மனுவை தாக்கல் செய்கின்றனர்.
-
-----------------------------------
தி இந்து

_________________