மத்திய அமைச்சருக்கு எதிராக காங்., உரிமை மீறல் தீர்மானம்

புதுடில்லி :
லோக்சபாவில் நேற்று, பார்லிமென்ட் விவகாரத்துறை அமைச்சர்,
அனந்த குமாருக்கு எதிராக, சபாநாயகரிடம், காங்., உரிமை
மீறல் தீர்மானத்துக்கான, 'நோட்டீஸ்' அளித்துள்ளது.

லோக்சபாவில் நேற்று, சபாநாயகர், சுமித்ரா மஹாஜனிடம்,
லோக்சபா, காங்கிரஸ் எம்.பி., - கே.சி.வேணுகோபால் அளித்துள்ள
உரிமை மீறல் தீர்மான நோட்டீசில் கூறப்பட்டுள்ளதாவது:

லோக்சபாவில் நிகழ்ந்துவரும் அமளி தொடர்பாக, தவறான
தகவல்களை, பா.ஜ.,வைச் சேர்ந்தவரும், பார்லி., விவகாரத்துறை
அமைச்சருமான, அனந்த குமார் அளித்து வருகிறார்.

இப்பிரச்னையில் தேவையின்றி, காங்., மூத்த தலைவர்கள்,
சோனியா, ராகுலின் பெயரை, அவர் குறிப்பிட்டு வருகிறார்.
இதன் மூலம், லோக்சபா மற்றும் நாட்டு மக்கள் கவனத்தை,
அவர் திசை திருப்பி வருகிறார்.

இதனால், அனந்த குமாருக்கு எதிராக, உரிமை மீறல் தீர்மானம்
கொண்டு வரப்பட வேண்டும். பார்லிமென்டை சுமுகமாக
நடத்துவதில், மத்திய அரசுக்கு ஆர்வமில்லை. அரசுக்கு எதிராக
கொண்டு வரப்படும் நம்பிக்கை இல்லா தீர்மானம் மீதும்,
பல்வேறு முக்கிய பிரச்னைகள் குறித்தும், எதிர்க்கட்சிகள்
விவாதம் நடத்த ஆர்வமாக உள்ளன.

ஆனால், இப்பிரச்னைகள் தொடர்பாக விவாதிக்க, மத்திய அரசு
விரும்பவில்லை. சபை வழக்கப்படி, அரசுக்கு எதிராக நம்பிக்கை
இல்லா தீர்மானம் கொண்டு வரப்பட்டால், அதை, முதலில்
விவாதிக்க வேண்டும். இவ்வாறு அவர் கூறிஉள்ளார்.
-
------------------------------
தினமலர்