பரம்பரை குடிகாரர்கள் யார்? பா.ஜ., மந்திரி பேச்சால் சர்ச்சை

லக்னோ,
உத்தர பிரதேசத்தில், இரண்டு சமூகத்தினரை பரம்பரை
குடிகாரர்கள் என, பா.ஜ.,வை சேர்ந்த அமைச்சர் கூறியது
பெரும் சர்ச்சையை ஏற்படுத்தியது.

உத்தர பிரதேச மாநிலத்தில், முதல்வர் யோகி ஆதித்யநாத்
தலைமையில், பா.ஜ., ஆட்சி நடக்கிறது.
இங்கு, பிற்படுத்தப்பட்டோர் மற்றும் மாற்றுத் திறனாளிகள்
நலத்துறை அமைச்சராக ஓம்பிரகாஷ் ராஜ்பர் உள்ளார்.

வாரணாசியில் நேற்று பேசிய ஓம்பிரகாஷ்,

''மற்ற சமூகத்தவரை விட, ராஜ்புத் மற்றும் யாதவ் சமூகத்தினர்,
பெரும் குடிகாரர்கள். ராஜ்பர் சமூகத்தினர் உட்பட எல்லாரும்
மது குடிக்கின்றனர். ''ஆனால், ராஜ்புத் மற்றும் யாதவ்
சமூகத்தினருக்கு, மது அருந்துவது பரம்பரை பழக்கம்,'' என்று
கூறியிருந்தார்.

இதையடுத்து, ஆத்திரம் அடைந்த இளைஞர்கள், லக்னோவில்,
அமைச்சர் ஓம்பிரகாஷ் ராஜ்பர் வீடு முன் கூடினர். அழுகிய
தக்காளி மற்றும் முட்டைகளை வீட்டுக்குள் வீசினர்.

வாசலில் இருந்த பெயர்ப்பலகை மற்றும் பூந்தொட்டிகளை
அடித்து நொறுக்கினர்.தகவல் அறிந்து, போலீஸ் வந்ததால்,
இளைஞர்கள் தப்பி ஓடினர். அமைச்சர் வீட்டில் தாக்குதல்
நடத்தியவர்கள் குறித்து, போலீசார் விசாரித்து வருகின்றனர்.

பா.ஜ., தலைவர்கள், தேவையற்ற விஷயங்களை பேசக்கூடாது
என, பிரதமர் நரேந்திர மோடி, சமீபத்தில் அறிவுரை கூறியிருந்தார்.

நேற்று முன்தினம், உலக அழகி குறித்து, திரிபுரா முதல்வர்,
திப்லப் குமார் தேப் கூறிய கருத்து சர்ச்சையை ஏற்படுத்தியது.
இந்நிலையில், உ.பி., அமைச்சர் ஓம்பிரகாஷ், தற்போது
சர்ச்ச.ையில் சிக்கியுள்ளார்.
-
--------------------------------------
தினமலர்