மட்டக்களப்பில் தொடரும் அடைமழை: போக்குவரத்து இடைநிறுத்தம்

மட்டக்களப்பு மாவட்டத்தில் பெய்துவரும் அடை மழையால் இலங்கை போக்குவரத்து சபையின் பேரூந்து சேவைகள் இடைநிறுத்தப்பட்டுள்ளதாக துறைசார் பிராந்திய முகாமையாளர் துரை மனோகரன் தெரிவித்தார்.

மட்டக்களப்பு போக்குவரத்து சாலையிலிருந்து புறப்படும் முனைக்காடு, கரவெட்டி, பாவற்கொடிச்சேனை, புலிபாய்ந்தகல், வலையிறவு, பாலமுனை, போன்ற இடங்களுக்கான போக்குவரத்துச் சேவைகளும் பதுளை, மன்னார், யாழ்ப்பாணம், வவுனியா, கிளிநொச்சி. கொழும்பு போன்ற தூர இடங்களுக்கான சேவைகளும் இடைநிறுத்தப் பட்டுள்ளதாக அவர் மேலும் தெரிவித்தார்.

மேலும் களுவாஞ்சிகுடி இலங்கை போக்குவரத்து சாலையிலிருந்து புறப்படும் மண்டூர், பாலையடிவடை, திக்கோடை, முதலைக்குடா, திருப்பழுகாமம், மகிழூர், போன்ற இடங்களுக்கான போக்குவரத்து சேவைகளும் இடநிறுத்தப் பட்டுள்ளதாக தெரிவித்தார்.

அத்துடன், களுவாஞ்சிகுடி போக்குவரத்து சாலை வெள்ள நீரில் மூழ்கியுள்ளதாகவும் அவர் மேலும் தெரிவித்துள்ளார்.

இதனைவிட கல்முனை மற்றும் வாழைச்சேனை ஆகிய பகுதிகளுக்கான போக்குவரத்து சேவைகள் மாத்திரம் தற்போது இடம்பெற்று வருவதாக அவர் தெரிவித்தார்.