கோவை : உலகத்தமிழ்ச் செம்மொழி மாநாடு

கோவை : உலகத்தமிழ்ச் செம்மொழி மாநாடு கண்காணிப்புக்கு "ஆளில்லா உளவு விமானம்' பயன்படுத்தப்படுகிறது. ஐந்து நாட்கள் நடக்கும் உலகத்தமிழ்ச் செம்மொழி மாநாட்டில், ஜனாதிபதி பிரதிபா பாட்டீல், முதல்வர் கருணாநிதி, துணைமுதல்வர் ஸ்டாலின், வெளிநாட்டு சிறப்பு அழைப்பாளர்கள், தமிழறிஞர்கள், ஆய்வாளர்கள், கட்டுரையாளர்கள் என 4,600 பேர் பங்கேற்கின்றனர். அண்டை மாநிலங்களில் இருந்தும், தமிழகம் முழுவதும் இருந்தும் பல லட்சம் மக்கள் பங்கேற்கவுள்ளனர்.
மாநாடு நடக்கும் கொடிசியா வளாகம், அலங்கார ஊர்திகளின் அணிவகுப்பு துவங்கும் வ.உ.சி., பூங்கா மைதானம், அணிவகுப்பு செல்லும் அவிநாசி சாலைப் பகுதிகள் போலீசின் கட்டுப்பாட்டில் கொண்டுவரப்பட்டுள்ளன. ஜனாதிபதி பிரதிபா பாட்டீல் தங்கவுள்ள ரேஸ்கோர்ஸ் அரசு விருந்தினர் மாளிகை மற்றும் முதல்வர், துணை முதல்வர், வெளிநாட்டு சிறப்பு அழைப்பாளர்கள் தங்கும் ஓட்டல்களிலும் உச்சகட்ட பாதுகாப்பு ஏற்பாடுகள் மேற்கொள்ளப்பட்டுள்ளன. மாநாட்டின் போது, கொடிசியா வளாகம் மற்றும் சுற்றியுள்ள பகுதிகளின் நிகழ்வுகளை கண்காணிக்க கேமராவுடன் கூடிய "ஆளில்லா சிறு ரக உளவு விமானம்' இயக்கப்பட உள்ளது. மேலும், கேமரா பொருத்திய ராட்சத பலூன், கொடிசியா வளாகத்தில் ஆயிரம் அடி உயரத்தில் பறக்க விடப்பட்டுள்ளது. உளவு விமானம், பலூனிலுள்ள கேமராக்களில் பதிவாகும் வீடியோ பதிவுகளை, கொடிசியா வளாகத்தில் அமைக்கப்பட்டுள்ள சிறப்பு கட்டுப்பாட்டு அறையின் மானிட்டரில் பார்த்து துரித நடவடிக்கை மேற்கொள்ளவும் ஏற்பாடு செய்யப்பட்டுள்ளது.