செம்மொழி நினைவாக கோவை மத்திய சிறைச்சாலையில் பூங்கா

கோவை மத்திய சிறைச்சாலையில் செம்மொழி பூங்கா ஒன்று அமைக்கப்படவுள்ளது.


உலகத்தமிழ் செம்மொழி மாநாட்டின் நினைவாக கோவையில் சர்வதேச தரம்வாய்ந்த
தாவரவியல் பூங்கா அமைக்கப்படும் என்று முதலமைச்சர் கருணாநிதி அறிவித்திருந்தார்.


இதற்காக கோவையின் மையப்பகுதியில் உள்ள கோவை மத்திய சிறைச்சாலை வளாகம்
தேர்ந்தெடுக்கப்பட்டது.

கோவையில் சிறந்த பொழுதுபோக்கு அம்சம் ஒன்றில்லாமல்,
வெளியூர்களுக்குச் சென்று வந்த கோவை நகர மக்களுக்கு செம்மொழி பூங்கா பெரும்
வரப்பிரசாதமாக அமையும் என எதிர்பார்க்கப்படுகிறது.

உலகத் தமிழ் செம்மொழி
மாநாட்டில் பங்கேற்க வந்த முதலமைச்சர் கருணாநிதி பூங்கா அமைக்கும் பணிக்கு அடிக்கல்
நாட்டினார். பூங்காவின் மாதிரி வரைபடமும் வெளியிடப்பட்டது. பூங்காவின் வரைபடத்தை
பார்த்து கோவை மக்கள் மகிழ்ச்சி அடைந்தனர்.

முதலமைச்சர் கருணாநிதி அடிக்கல்
நாட்டியதைத் தொடர்ந்து பூங்கா அமைக்கும் முதல்கட்டப்பணி தொடங்கியுள்ளது. கம்பிவேலி,
முள்வேலிகள் அகற்றப்பட்டு சீரமைக்கும் ஆரம்ப கட்டப்பணிகள் ஆரம்பித்திருப்பதாக
டி.ஐ.ஜி. கோவிந்தராஜ் தெரிவித்தார்.

சிறை வளாகத்தில் 165 ஏக்கர் பரப்பளவில்
முதல்கட்டமாக 50 ஏக்கர் பரப்பளவில் ரூ.20 கோடி செலவில் பணிகள் நடைபெற்று வருகின்றன.
சென்னை நதி நீர் சீரமைப்பு அறக்கட்டளையினர் பூங்காவின் மாதிரி வரைபடத்தைத்
தயாரித்துள்ளனர். இதன் அடிப்படையில் பூங்கா அமைக்கப்படுகிறது.