பச்சடி வகைகள்-

பச்சடி வகைகள்-


கத்தரிக்காய் பச்சடி

தேவையான பொருட்கள்:

கத்தரிக்காய்- 250 கிராம்.

சிறிய வெங்காயம்- 100 கிராம்

மிளகாய்-15 கிராம்

தயிர்- ஒரு கப்.

தேங்காய்- சிறியது

உப்பு- தேவையான அளவு.

செய்முறை:

1. கத்தரிக்காயை நெருப்பில் சுட்டு அதன் தோலை உரித்து எடுத்து நன்றாக பிசைந்து வைக்கவும்.
2. பாதியளவு தேங்காயை விழுதாக அரைக்கவும்.
3. கடுகு, உளுந்து போட்டு தாளிக்கவும் அதில் நறுக்கிய வெங்காயம், மிளகாய் சேர்த்துக் கிளறவும்.
4. அதில் சிறிது தேங்காய்த் துருவல், உப்பு சேர்த்து கத்தரிக்காய் மசியலுடன் சேர்த்து அடுப்பில் வைத்திருக்கவும்.
5. கடைசியாக தயிர் சேர்த்து இறக்கவும்.


கோஸ் பச்சடி

தேவையான பொருட்கள்:

முட்டைக்கோஸ் - 250 கிராம்

மிளகாய் - 3 எண்ணம்

வெங்காயம் - சிறிது

உப்பு - தேவையான அளவு

மல்லித்தழை - தேவையான அளவு

கடுகு உளுந்து - தேவையான அளவு

நல்லெண்ணெய் - 1 தேக்கரண்டி

செய்முறை:

1. முட்டைக்கோஸை நீளவாக்கில் நறுக்கி வைத்துக் கொள்ளவும்
2. வாணலியில் எண்ணெய் ஊற்றி காய்ந்ததும் கடுகு, உளுந்து, வெங்காயம் போட்டு வதக்கி பின் அதில் நறுக்கி வைத்த கோஸைச் சேர்த்து கிளறவும்.
3. உப்பு, மிளகாய், மல்லித்தழை நறுக்கிப் பொட்டு இறக்கவும்.

• துருவிய காரட் சேர்த்தால் பார்ப்பதற்கு நன்றாக இருக்கும்.


முட்டைக்கோஸ் மோர்க்கூட்டு

தேவையான பொருட்கள்:

முட்டைக்கோஸ் - 250 கிராம்

புளித்த மோர் - 250 மில்லி கிராம்

உப்பு - தேவையான அளவு

மஞ்சள் பொடி - கால் மேசைக்கரண்டி

அரிசிமாவு - ஒரு சிறிய தேக்கரண்டி

அரைக்க வேண்டிய சாமான்கள்

தேங்காய் - அரை மூடி

பச்சைமிளகாய் - 5 எண்ணம்

வரமிளகாய் - 2 எண்ணம்

சீரகம் - கால் தேக்கரண்டி

தாளிக்க வேண்டிய பொருட்கள்

கடுகு - ஒரு சிறிய மேசைக்கரண்டி

கறிவேப்பிலை - 10 இலைகள்

தேங்காய் எண்ணெய் - இரண்டு மேசைக்கரண்டி

செய்முறை:

1. முதலில் முட்டைக்கோஸை பொடியாக நறுக்கி உப்பு, மஞ்சள் போட்டு வேக வைக்கவும்.
2. அரைக்க கொடுத்துள்ளவற்றை நைசாக அரைத்துக் கொள்ளவும்.
3. நன்கு கோஸ் வெந்தவுடன் அரைத்ததை போட்டு, பத்து நிமிடம் கொதிக்க விடவும். பின்னர் மோரை அதனுடன் சேர்த்து, சிறிது தண்ணீரில் அரிசி மாவைக் கரைத்து அதனுடன் சேர்க்கவும்.
4. இறக்கி வைத்தவுடன் தாளிக்க வேண்டியவற்றை சேர்த்து தாளிக்கவும்