இது எப்படி இ௫க்கு?

இது கன்றுக்குட்டி அல்ல, 'அம்மு'க்குட்டி!

முதல்வர் ஜெயலலிதாவின் பிறந்த நாளான பிப்ரவரி 24-ம் தேதியன்று விருதுநகர் மாவட்டம், ஸ்ரீவில்லிப்புத்தூரில் ஒரு கன்றுக்குட்டி பிறந்தது. வழக்கமாக, ஆடு, மாடுகளின் உடலில் பலவித நிறங்களும் இருக்கும். உடல் முழுக்க குறிப்பிட்ட ஒரு நிறம் பரவியிருக்க... ஆங்காங்கே வெள்ளை, கறுப்பு என வேறு ஏதாவது நிறமும் திட்டுத் திட்டாக இருக்கும். இந்தக் கன்றுக்குட்டி ‘J’ வடிவ திட்டு ஒன்றுடன் பிறக்க... விடுவார்களா தொண்டரடிப்பொடிகள். மாலை மரியாதையெல்லாம் செய்து... அதைக் கொண்டாடிக் கொண்டிருக்கிறார்கள் அந்த மாவட்டத்தைச் சேர்ந்த அ.தி.மு.க. முக்கிய புள்ளிகளும் தொண்டரடிப்பொடிகளும்!

''அம்மாவே எங்க ஊர்ல பொறந்திருக்கிற மாதிரி இருக்குது'' என்று பூரிக்கிறார் அந்த ஊரின் நகர்மன்ற தலைவியான செந்தில்குமாரி.

இப்படித்தான் பல ஆண்டுகளுக்கு முன்பு, மாட்டுக்கண்ணில் எம்ஜிஆர் தெரிகிறார் என்று சொல்லி, ஒரு மாட்டை ஊர் ஊராக ஓட்டிக் கொண்டு போய், டிக்கெட் போட்டு பணம் வசூலித்தார்கள். அதேபோல இந்தக் கன்றுக்குட்டிக்கும் ஏதாவது கொடுமை நடக்காமலிருந்தால் சரி!