வெளுத்துகட்டு - காதலி கற்பித்த பாடம்!

Comments

காதல் என்பது ஒரு இளைஞனை மிருகமாகவும் மாற்றும்; கடவுளாகவும் ஆக்கும் என்ற கருத்தை கருவாக கொண்ட கதை.
ஒரே கிராமத்தில் வசிக்கும் கதிரும், அருந்ததியும் சிறு வயதில் இருந்தே காதலிக்கிறார்கள். கதிர் படிப்பு ஏறாமல் இடையில் நிறுத்திவிட்டு அடிதடி என ஊதாரியாகிறார். இருந்தாலும் அருந்ததியை உயிருக்கு உயிராய் நேசிக்கிறான். அருந்ததியும் கதிரை உடல், பொருள், ஆவி என நேசிக்கிறார். "ஒரு வேளை கஞ்சி ஊத்த வக்கில்லாதவனையா கல்யாணம் பண்ணிக்கப்போற?" என்று காதலுக்கு எதிர்ப்பு தெரிவிக்கின்றனர் அருந்ததி பெற்றோர். உடனே ஆவேசமாகும் அருந்ததியோ, கதிரிடம் வெளியூர் போய் நிறைய பணம் சம்பாதித்து என் குடும்பத்துக்கு தகுதியான மருமகனாக வந்து என்னை கட்டிக்கொள் என்கிறார். காதலுக்காக சென்னை வரும் கதிர் கஷ்டப்பட்டு உழைத்து முன்னேறி பெரும் பணம் சம்பாதிக்கிறார். அருந்ததி ஆசைப்பட்ட மாதிரி மாறி ஊருக்கு செல்கிறார். ஆனால் அங்கு அருந்ததியின் நிலைமை வேறாக இருக்கிறது. அருந்ததி, கதிர் சேர்ந்தார்களா? என்பது இறுதிக்காட்சி.
வழக்கமான கதை, வித்தியாசமான அணுகுமுறை, திரைக்கதையில் திருப்பத்தை ஏற்படுத்துகிறது. பழைய படங்களின் நிழல்களில் புதிய சாயம்.
புதுமுகம் கதிர் நடிப்பில் யதார்த்தம். கொஞ்சம் பருத்திவீரனை நினைவுபடுத்தாமல் இருந்திருக்கலாம். நகரத்தில் டிபன் வியாபாரம் செய்யும் வண்டியை போலீசார் நொறுக்கி போட்டதும் அழுது புலம்பி இதயத்தை கனக்க வைக்கிறார். அருந்ததியும் நல்ல வரவு, கோடம்பாக்கத்தில் ஒரு இடம் ஒதுக்கப்பட வாய்ப்புள்ளது. புதுமுகம் என்றாலும் நடிப்பில் முதிர்ச்சி. காதலி, விளையாட்டாக சொன்னதற்காக உயரமான அருவியில் இருந்து குதிப்பதும் அவரைக் காணாமல் அருந்ததி பதட்டத்துடன் தேடுவதும் அவன் வந்ததும் அவனை அடித்து, "என்னடா இப்படி பண்ணிட்ட" என்று கதறுவதுமான அழகான கிராமத்து காதல் அற்புதம். தன்னை பெண் பார்க்க வந்த மாப்பிள்ளையிடம், "இதபாரு என்னை கல்யாணம் பண்ணிக்கிட்டாலும் உங்கூட இருக்கிற ஒவ்வொரு நிமிஷமும் என் கதிர்கூட இருக்கிறதா நினைச்சுக்குவேன். பரவாயில்லையா?" என்று கேட்கும்போதும், "இது கதிரோட உடம்புடா. இதையா தொட்ட" என்று சொல்லி வில்லனை துரத்துவதும் சபாஷ்! அருக்காணி சரியான "அருவா"காணி தான்!
ஒரே பாட்டில் பணக்காரன் ஆகிவிடுவான் என்ற எதிர்பார்ப்பை திருப்பிப்போட்டது இயக்குனர் சேனாபதி மகனின் திறமைக்கு வெளிச்சம். பரணியின் பாடல்களில் மண்மனம். சிங்கம்பட்டி கிராமத்தை மனத்திரையில் ஒட்டவைத்த சுகுமாரின் ஒளிப்பதிவு கச்சிதம். வழக்கமாக சட்டம், போலீஸ், நீதிபதி, வக்கீல் என்ற வட்டத்துக்குள் ஆக்ஷன் படம் தரும் எஸ்.ஏ.சந்திரசேகரன், புதியவர்களை வைத்து மண்சார்ந்த யதார்த்த படம் ஒன்றை தந்ததிருக்கிறார். நாயகன் + நாயகி + (கதை, திரைக்கதை, வசனம், இயக்கம்) + (வில்லன் + கற்பழிப்பு காட்சி) = எஸ்.ஏ.சி. தயாரிப்பு.
கோவில் கட்றது, சில 100 குடிசைகள் உள்ள சிங்கம்பட்டியில ஏசி உணவகம் நடத்துறது.... இதல்லாம் ஹீரோயிசத்தை காட்டுவதற்காக என்றாலும் சுத்தமா லாஜிக்கே இல்லை! சிறுவர்கள் காதல், கல்யாணம்... கத்திரி போட்டிருக்கலாம். வளரும் தலைமுறைகளின் சிந்தனைகள் சீரழியும் இந்த காலகட்டத்தில் இயக்குனர்கள் சற்று சிந்தித்து கதையமைத்தால் நலமாயிருக்கும். பள்ளிகளில் நடக்கும் பல கொடூரங்களுக்கு வித்திடுவதை தவிர்க்கலாம்! மற்றபடி அனைவரும் வெளுத்து கட்டியிருக்கிறார்கள்.

உண்மையில் நல்லப்படம் பாருங்கள் உஙகளுககும் பிடிக்கும் நம்ம தளத்திளே இருக்கு........