நான் ரசித்த கவிதைகள்

First topic message reminder :

எதிரியை வீழ்த்தும் வார்த்தைகள் தேடி
மெனக்கெடும் நேரத்தில்
என்னை நோக்கிப் பாய்கிறது
முன்பைவிட கோரமாய்
அவனின் வசவுகள்
-
தேடலின் தவறுகள்
எனக்கு மட்டுமே நிகழ்ந்தாலும்
ஆச்சரியப்படாமல்
இருக்கத்தான் முடியவில்லை
அவனின்
இயல்பான இந்த
வசவுகளைக் கண்டு!
-
----------------------
>ஜி.மாஜினி
நன்றி: கல்கி

வெறுமை

வெளிச்ச‌த்தை விர‌ட்டும்
இருள் எங்கும் சூழ்ந்த‌
கான‌ல்வ‌ழி சாலையில் _ என் வாழ்க்கைச்ச‌க்க‌ர‌ம் ம‌ட்டும்
எப்ப‌டியோ வேக‌மாக
சுழன்று கொண்டுதான் இருக்கிற‌து!!!
த‌ண்ட‌வாள‌ம் இல்லாத‌ ர‌யில்...!!!
கட்டுபாடுக‌ள‌ற்ற‌ ம‌ன‌ம்...!!!
எங்கும் எதிலும் யாவ‌ரும் _ இதுவ‌ரை
வெறும் பிம்ப‌ங்க‌ளாக‌வே ப‌ய‌ணிக்கின்ற‌ன‌ர்!!!
இத்த‌னை வ‌ருட‌ங்க‌ள் க‌ட‌ந்திருப்பினும்_இன்னும்
என்னால் க‌ண்டுகொள்ள‌ முடிய‌வில்லை
என‌க்கே என‌க்கான ஒரு ச‌க‌ ம‌னித‌னை!!!!
ஒரு வேளை...... அவ‌ன்....
உங்க‌ளில் ஒருவ‌னாக‌
கூட‌ ஒளிந்திருக்க‌லாம்..!!!
விடை சொல்லுமா கால‌ம்???

நன்றி http://vaneeth.blogspot.in/

என் இற‌ப்புக்கு முன் !!!

வெளியே தெரியாத வேர்களைப் போல்
சுற்றி கொண்டிருக்கும் எண்ணங்கள்...
கவனங்களில் சிதறி தெறித்து _
என் எதிரே தீ பிழம்புகளாய்
துவண்டு விழுந்த‌ வ‌ண்ண‌ம் இருக்கின்ற‌ன‌...
இறுதியாக‌ என் மூச்சுக‌ள் நிற்கும் முன்பு,
எதையோ எங்கேயோ யாரிட‌மோ
சொல்லிவிட‌ வேண்டும் என்று துடிக்கிற‌து இத‌யம்...
அய்யோ..என் செய்வேன்..
அட‌ங்க‌ துடிக்கும் துடிப்புக்கு வேக‌ம் அதிக‌ம்..
அதையும் மீறி சொல்லிவிட‌ நினைக்கும் ம‌ன‌து..
இர‌ண்டும் போட்டி போட்டுக்கொண்டு..
இதோ என் எதிரில் ச‌ம்ம‌ண‌மிட்டு எக‌த்தாள‌ம் போடுகின்ற‌ன‌...!!!
அத‌ற்கு பின்னால் க‌ருகிய‌ க‌ன‌வுக‌ளும் ..
க‌லைந்து போன‌ க‌ற்ப‌னைக‌ளும் ..
அடிக்கிற காற்றில் கிழிகின்ற‌ ப‌ட்ட‌மாய் _ தாங்கி
நிற்கிற‌து கால‌ம் என்கிற‌ நூல்!!!!
எப்போது அறுந்து விழ‌ப்போகிற‌தோ
ஆவ‌லுட‌ன் பார்க்கும் இத‌ய‌மும்
அதை ஆவேச‌மாய் அட‌க்க முய‌லும் ம‌ன‌மும்...
கால‌ம்
இதோ..இப்போதே...
முடிய‌ போகிற‌தோ....
க‌டைசி வ‌ரை
இவ‌ற்றை நினைத்து நினைத்தே
சொல்ல‌ வ‌ந்த‌தையும் எவ‌ரிட‌மும் இய‌ம்பாம‌ல்...
மெள‌ன‌மாய் என‌க்குள் மெல்ல‌ சூழ்ந்த‌து _சாவு என்னும் இருட்டு....!!!!

நன்றி http://vaneeth.blogspot.in/

என்னுள்ளே எனக்காய் சில மாற்றங்கள்...
மழை வருவதற்க்கு முன்
முளைக்கின்ற‌ இருண்ட மேகங்கள் போல...!!!!
உன் காதல் உணர்வதற்க்கு முன்னரே
சில அதிர்வுகள்......
நினைக்கும் போதெல்லாம்
ஸ்பரிசிக்கும் உணர்வுகள்...
உலகினை சுற்றும் கோள்களை விட‌
வேகமாய் சுழலுகிறது என்னுள்
உந்தன் நினைவுகள்...!!!
நினைவுகளில் எல்லாம் நீயா? இல்லை
நீ மட்டுமே என் நினைவுக‌ளா?
எதுவாக‌ இருப்பினும்
இந்த‌ காத‌ல் வ‌ந்து சேரும் பொழுதினை விட‌
வ‌ரும் முன் நிக‌ழும் க‌ண‌ங்க‌ள்
எல்லாமே மிக‌வும்
எதிர்பார்ப்புக்குள்ளாகின்ற‌ன‌..!!!

நன்றி http://vaneeth.blogspot.in/

மௌனம்‌...!!!!

நூலிழை இடைவெளியில்
சந்தடியே இல்லாமல் எனக்குள் மட்டும்
எங்கே எப்படி நுழைந்தது
இந்த பாழாய் போன மௌனம்‌...!!!!
தெரிந்து கொள்ள விடை தேடிக்கொண்டிருக்கிறேன்
நீ
என்னை பெண் பார்க்க வருகிறாய்
என்று சொல்லிய அந்த பொழுதோ?
எல்லோரும் அமர்ந்திருக்க
என் அக்கா அழைத்து வந்த நொடி
நீ
சிரித்த கள்ளமில்லா வெள்ளை மனமாய்
விரிந்த அந்த பொழுதோ?
நாம் இருவரும் நம்முடன் பலரும் கூடி
அளவுடன் பேசிக்கொண்ட‌ கோவில் வளாகத்தில்
சற்று இளைப்பாற அமர்ந்து உடன் எழுந்து கொண்ட
அந்த பொழுதிலா??
இன்னும் நிறைய பொழுதுகள்
நினைவில் நீந்திய வண்ணம் தான் இருக்கிறது...!!!
வந்ததை அனுபவிக்க மனம் இன்றி
எப்படி வந்திருக்கும் என ஆராய்வதிலேயே
நிகழ்கின்ற கணங்கள் நீண்டு கொண்டேயிருக்கிறது‌....!!!

நன்றி http://vaneeth.blogspot.in/

நட்பு

உன் வருகைக்காக காத்திருந்த‌
ஒவ்வொரு வினாடித்துளிக‌ளும்
ஒவ்வொரு யுக‌ங்க‌ளாய் _ நீ
வ‌ந்த‌பின் நாம் கூடி பேசி ம‌கிழ்ந்த‌
ஒவ்வொரு யுக‌ங்க‌ளும்
ஒவ்வொரு வினாடிக‌ளாய் போன‌து எப்ப‌டி???
மீண்டும் மீண்டும் கேட்டாலும் கிடைக்காத‌
அந்த‌ நாட்க‌ளை தேடி தேடியே _ என் வாழ்க்கை
கரைக்க‌ப்ப‌டும் என்றாலும்
நான் திரும்ப திரும்ப‌ கேட்ப‌து
உன‌க்காக‌ கால்வ‌லிக்க சைக்கிளில் சுற்றிய
அந்த ப‌சுமையான‌ நாட்க‌ள் வேண்டும்...!!!
கார‌ண‌மே இல்லாம‌ல் சிரித்து
போகும் வ‌ழியெல்லாம் சாலைக‌ளில்
வ‌ழிந்திட்ட‌ அந்த‌ ச‌ந்தோஷ க‌ண‌ங்க‌ள் வேண்டும்...!!!
நான் த‌வ‌று செய்தால் _ நீ
உரிமையோடு திட்டிய நாட்க‌ள் வேண்டும்...!!!
வாழ்கின்ற‌ வாழ்க்கை
ஒருநாளே என்று முடிவானால்
உன்னோடு இருக்கும்
இனிமையான‌ ப‌சுமையான‌
அந்த‌ ஒரு நாள் வேண்டும்...!!!
இன்னும் சொல்ல‌ப்போனால்
என் உயிர் உறையும் வ‌ரை
சில நட்புகள் வேண்டும்...
நிலைக்குமா...???

நன்றி http://vaneeth.blogspot.in/

நானும் ரசித்தேன்

நட்சத்திரங்களின்
ஒளிச்சொற்களால்
பூக்களின் இதழ்களில்
காற்றின் பாடல்களுக்கு
கையொப்பம் இட வந்தவன்

என்னை
கணிதப்பாடத்தை
மனனம் செய்யச்சொல்லி
கட்டாயப்படுத்தாதீர்கள்..!

கொட்டும் அருவிகளின்
வற்றாத ஜீவநதிகளின்
அடர்ந்த காட்டின்
பேரமைதியில்..
தனித்திருக்க வந்த
இயற்கையின்
யாசகன் நான்..!

என்னை
செல்வந்தர்களிடம்
கையேந்தி நிற்கச் சொல்லி
காயப்படுத்தாதீர்கள்..!

ஒரு பறவையைப் போல
பூமியை தரிசிக்க வந்த
யாத்ரீகன் நான்..!

குடும்பம், சாதி, மதம்
ஆகிய கூண்டுகளில்
சிறைப்பிடிக்க வேண்டி
என் சிறகுகளை
வெட்டி விடாதீர்கள்..!

என் வண்ணங்கள்
பிடிக்கவில்லை என்றால்
விலகிச் செல்லுங்கள்..!

உங்களின் சாயத்தை..
என் மீது பூசிச் செல்லாதீர்கள்..!
பெருமழைக் காத்திருக்கிறது
வண்ணங்கள் கலைந்திடும்
வாழ்க்கை ஒரு வானவில்..!

பூட்டி வைத்த..
ஆபரணங்களுக்காக
நீங்கள் விழித்திருங்கள்..!

ஒரு நாடோடியின்
இரசனை மிகுந்த
இராத்திரியைப் போல
மிஞ்சியிருக்கும்
இந்த வாழ்க்கை
எனக்குப் போதும்..!

மரணத்தின் வாழ்வை
தினமும் வாழ்பவன்..!
வாழ்வின் மரணத்தை
என் மீது
திணித்து விடாதீர்கள்..!

பயணிக்காத
கப்பலின் பாதுகாப்பு
எனக்கு வேண்டாம்..!
ஒரு புயலைக்
கடந்து செல்லும்
ஒரு கட்டு மரம் போல்
வாழ்வேன்..!

வேதங்களின்..
மந்திரச்சொற்களால்
சிறைவைக்கப்பட்ட
உங்கள் இறைவன்
எனக்கு வேண்டாம்..!

தாய்மையின் சிறகுகளாய்
கைகள் விரித்து
காத்திருக்கும்
காலத்தின் மடியில்
சரணடைவேன்..!

சுவடுகள்
ஏதுமின்றிக் கரையும்
ஒரு நொடி போதும்..!
கடலிற்குள்
காணாமல் போகும்
நதியாவேன்..!

அமீர் அப்பாஸ்

உள்ளாடையின் மேல்விளிம்பு
வெளியே நீட்டிக் கொண்டிருப்பதை
பொருட்படுத்தாத நீ,
உரக்கச் சிரிப்பதும்
ஆண்கள் அழுவதும்
இருகைகளால் கோப்பையைப் பிடித்து
தேநீர் அருந்துவதும்
அநாகரீகம் என்ற முறைமையை
யாரிடம் கற்றாய் ?

உன் முறைமைகளை
கட்டிக் காக்கும்பொருட்டு
சதா சிடுசிடுக்கும் உன் முகம்,
உன் முகமாக இல்லாமலிருப்பதைப் பற்றிய
கவலையெதுவும் உனக்கில்லை
எனக்கு கவலையாக இருக்கிறது
உன் அபத்த முறைமைகளைப் பற்றியும்
உன் துர்முகத்தைப் பற்றியும்

- க.உதயகுமார்

ராச களவு

மொட்டமலை மேய்ப்பனிடம்
பொட்டமண் சுட்டெரித்த பொழுதில்
துப்புவாங்கிய மதுராபுதூர் களவாணி
சாமத்தில் வானம் பார்த்து
விண்மீன் தேடி
நல்சகுனம் நாடி
கன்னம் வைக்கிறான்
கச்சிராய பாளையம் ராசா வீட்டில்
மணிமுடி முத்துமாலை வைர அட்டிகை
வைடூரிய அணிகலன் பொன்ஆபரணம் என
அனைத்தையும் விடுத்து அள்ளிப் போகிறான்
கோட்டை நெல்லை தொம்பையிலிருந்து
பொழுது விடியும் முன்பாய்
விரைகிறான் புகைக்கூண்டு வழியே
இன்றைய இரவில் நிலவொளியில்
பசியாறும் ஒரு பஞ்சக்கூட்டமும்
பகலில் குருவிக்கூட்டமும்.

- ஸ்ரீதர்பாரதி

ஒரு தேசியக்கொடியும் சில கட்சிக்கொடிகளும்

சாதிகளும் மதங்களும்
கொலைக்கான
சுதந்திரத்தைக் கோருகின்றன..!

குடிதண்ணீர் கிடைக்காத
ஊர்களுக்கு மத்தியில்
மது
நதியாகி ஓடுகிறது..!

வங்கிக் கையிருப்பின்
அளவைப் பொறுத்து
மாறுபடுகிறது
பேரன்பும் பெருங்காதலும்..!

உழைப்புக்கு ஊதியம்
மறுக்கப்படும் உலகில்
களவுகள்
தங்களுக்கான சுதந்திரத்தை
தாங்களே..
கொண்டாடித் தீர்க்கின்றன..!

வரம்பு மீறிய
வன்முறையின் சுதந்திரத்தை
போர்கள் என்கிற
புனைப்பெயரில்
வரலாறு நெடுகிலும்
வாசிக்க முடிகிறது..!

எப்போதும் ஏழைகளுக்கு
எட்டாத உயரத்தில்
கட்சிக்கொடிகள்
காற்றில் படபடக்கின்றன..!

கொடிகளை..
மாற்றி ஏற்றுவதால்
கொண்டாடப்படுவதில்லை
சுதந்திர தினம்..!
கொள்கைகள் எப்போதும்
அரைக்கம்பத்தில் பறக்கின்றன..!

அமீர் அப்பாஸ்

நானும் ரசித்தேன்
நன்றி