கார்கில் வெற்றி விழா: நாடு முழுவதும் கொண்டாட பா.ஜ.க முடிவு

பாகிஸ்தானுக்கு எதிரான கார்கில் போர் வெற்றியை இந்த ஆண்டு நாடு முழுவதும் கோலாகலமாகக் கொண்டாட பாரதிய ஜனதா கட்சி முடிவெடுத்துள்ளது.

பாரதிய ஜனதா தலைமையிலான தேசிய ஜனநாயக கூட்டணி ஆட்சிக்கு கிடைத்த மாபெரும் வெற்றி பாகிஸ்தானுக்கு எதிரான கார்கில் போர் வெற்றி.

பாகிஸ்தான் இராணுவத்தை வீழ்த்தி இந்திய இராணுவம் வெற்றி கண்ட ஜூலை 26ஆம் தேதியை ஒவ்வொரு ஆண்டும் கார்கில் வெற்றி தினமாக பா.ஜ.க கொண்டாடி வருகிறது. ஆனால் இந்த வெற்றி தினம் இதுவரை டெல்லி உள்பட சில நகரங்களில் மட்டுமே கொண்டாடப்பட்டு வந்தது.

இந்நிலையில் கார்கில் வெற்றியை இந்த ஆண்டு நாடு முழுவதும் கொண்டாட பா.ஜ.க முடிவெடுத்துள்ளது. பயங்கரவாதிகளுக்கு எதிராக காங்கிரஸ் தலைமையிலான அரசு மென்மையான போக்கை கடைப்பிடித்து வருகிறது. ஆனால் பா.ஜ.க தனது ஆட்சிக் காலத்தில் பயங்கரவாதிகளை இரும்புக்கரம் கொண்டு ஒடுக்கியது. கார்கில் போரில் பாகிஸ்தானை தோற்கடித்ததை நாட்டு மக்கள் வெற்றி விழாவாகக் கொண்டாட வேண்டும். இதை நாட்டு மக்களுக்கு புரிய வைக்கவே தற்போது அந்த தினத்தை நாடு முழுவதும் கொண்டாட திட்டமிடப்பட்டுள்ளது என்று பாரதிய ஜனதா வட்டாரம் தெரிவித்துள்ளது.

கார்கில் வெற்றி தினத்தன்று கட்சியின் தேசிய தலைவர் நிதின் கட்கரி தலைமையில் பா.ஜ.க தொண்டர்கள், ‌டெல்லியில் உள்ள அமர் ஜவானில் மரியாதை செலுத்துவர். இதுபோல, ஒவ்வொரு மாநிலத்திலும், கார்கில் போரில் வீர மரணம் எய்திய வீரர்களின் நினைவிடத்தில் பா.ஜ.க. தலைவர்களும், தொண்டர்களும் மரியாதை செலுத்துவர் என்று கட்சியின் பொதுச் செயலாளர் விஜய் கோயல் தெரிவித்தார்.

1999இல் கார்கில் போர் நடைபெற்றது. 74 நாள்கள் நடைபெற்ற இந்தப் போரில் பாகிஸ்தான் இராணுவத்தை வீழ்த்தி இந்திய இராணுவம் வெற்றி கண்டது. இந்தப் போரில் இந்திய வீரர்கள் 527 பேர் தாய் மண்ணைக் காக்க தங்களது இன்னுயிரை