தொடரும் ஆண்குழந்தைகள் கடத்தல்!

புதுச்சேரி மருத்துவமனைகளுக்குப் பிரசவம் பார்க்க வரும் தாய்மார்களுக்கு எச்சரிக்கை. ஆண் குழந்தை பிறந்து, அக்குழந்தை கடத்தப்பட்டால் நாங்கள் பொறுப்பல்ல” என்ற அறிக்கையை புதுச்சேரி அரசு விரைவில் அறிவிக்கலாம்

. காரணம், புதுச்சேரியில் ஒரே ஆண்டில் 36 கொழு கொழு ஆண்குழந்தைகள் காணாமல் போய் இருப்பதுதான்.

புதுச்சேரியில் அரசு மகப்பேறு மருத்துவமனை மற்றும் ஜிப்மர் மருத்துவமனையில்தான் ஆண் குழந்தைகள் கடத்தப்பட்டு வருகின்றன. புதுச்சேரி மருத்துவமனைகளில் புதுவைக்காரர்களைவிட சுற்றியுள்ள விழுப்புரம், கடலூர், திருவண்ணாமலை மாவட்டங்களைச் சேர்ந்தவர்கள்தான் அதிக அளவில் பிரசவத்திற்கு அனுமதிக்கப்படுகின்றனர். ‘தமிழகத்தைவிட இங்கு தரமான மருத்துவ சேவை இருப்பதால்(!) அதிகமான கூட்டம் அலைமோதுகிறது’ என்று மருத்துவமனை வட்டாரங்கள் தெரிவிக்கின்றன. கூடவே குழந்தைகளை கடத்தும் கும்பலும் வந்துவிடுகின்றன என்பதும் மிகையில்லை.

கடந்த வாரம் விழுப்புரம் மாவட்டம் கள்ளக்குறிச்சி அருகே உள்ள தௌதொரசலூர் கிராமத்தைச் சேர்ந்த மின்னல்கொடி என்பவர் பிரசவத்திற்காக புதுச்சேரி ஜிப்மர் மருத்துவ மனையில் அனுமதிக்கப்பட்டார். அவருக்குப் பிறந்த ஆண் குழந்தை கண் இமைக்கும் நேரத்தில் காணாமல் போனது. குழந்தையைப் பறிகொடுத்த மின்னல்கொடியின் புகாரின் பேரில் போலீஸார் லியோ பாத்திமா என்ற பெண்ணைக் கைது செய்தனர். ஆனால், இவரின் வாக்குமூலம் பரிதாபத்திற்குரியதே என்கின்றனர் போலீஸார்.

லியோ பாத்திமாவுக்கும் வினோத்குமாருக்கும் திருமணமாகி இரண்டு ஆண்டுகளாகியும், குழந்தை இல்லை. பாத்திமாவுக்குக் குழந்தை பிறக்கவில்லை என்ற காரணத்தால், வினோத்குமாருக்கு இரண்டாவது திருமணம் செய்யப்போவதாக அவரது தாயார், அக்கம்பக்கத்தில் பேச, பாத்திமா ஆடிப்போனார். கூடவே, ஐடியாவும் ஓடிவந்தது. கர்ப்பம் அடைந்ததாக நாடகமாடிய பாத்திமா, கணவர் ஊரான மரக்காணத்தைவிட்டு புதுவையில் உள்ள தனது தாய் வீட்டிற்கு வந்தார். தாய் வீட்டிலும் நாடகம் அரங்கேறியது. ஜிப்மர் மகப்பேறு வார்டுக்குள் அவ்வப்போது வந்து சென்ற பாத்திமாதான், மின்னல் கொடியின் குழந்தையைக் கடத்திச் சென்றார். எப்படியோ போலீஸ் மோப்பம் பிடித்து, பாத்திமாவைக் கைது செய்தது. குழந்தையைக் காப்பாற்றிவிட்டது.

கடத்தப்படும் குழந்தைகளை வெளிநாட்டுக்கும் வெளி மாநிலத்துக்கும் இரண்டு லட்ச ரூபாய் வீதம் விற்கப்படு-வதாக, புதுச்சேரி மக்களிடையே பரவ-லான பீதி கிளம்பியுள்ளது. புதுச்சேரி மருத்துவ-மனைகளையே இந்தக் கடத்தல் கும்பல் சுற்றிவருவதாகவும் போலீஸுக்குத் தகவல் கிடைத்துள்ளது.

புதுச்சேரியில் பெருகிவரும் குழந்தை கடத்தல் சம்பவங்கள் தொடர்பாக, போலீஸ் உயர் அதிகாரி ஒருவரிடம் கேட்டதற்கு, “இந்த ஆண்டு மட்டும் 36 கைக்குழந்தைகள் கடத்தல் வழக்கு பதிவாகியுள்ளது. இந்தக் கும்பலை கண்டுபிடித்துவிடுவோம் என்பதில் உறுதியாக இருக்கிறோம்” என்றார்.

புதுச்சேரி மருத்துவமனைகளில் மகப்-பேறுக்காக வரும் பெண்கள் மடியில் மழலை-யுடன் நெருப்பையும் கட்டிக்கொண்டு இருக்கிறார்கள் என்பதுதான் நிஜம்!

பெண்களின் பிரச்சனைக்கு அளவே இல்லாமல் போய்விட்டது