எச்சரிக்கை விடுத்த உளவுத்துறை: கோட்டை விட்ட போலீஸ்

சென்னை:சென்னை, திருச்சி, மதுரை ஆகிய இடங்களில் குண்டுவெடிப்பு நடக்க வாய்ப்பிருப்பதாகவும், உஷாராக இருக்கும்படியும் உளவுத்துறை எச்சரிக்கை விடுத்தும், தமிழக போலீசார் கோட்டை விட்ட தகவல் வெளியாகி உள்ளது.

கடந்த ஏப்., 8ல், தமிழக உளவுத்துறை, சென்னை நுண்ணறிவுப் பிரிவு இணை கமிஷனர், அனைத்து போலீஸ் கமிஷனர்கள், சென்னை விமான நிலையம் உள்ளிட்ட அனைத்து முக்கிய அதிகாரிகளுக்கும் ஒரு சுற்றறிக்கை அனுப்பி உள்ளார்.

அதில் கூறப்பட்டிருப்பதாவது:இலங்கையில், பாகிஸ்தானியர்களால் நன்கு பயிற்சி அளிக்கப்பட்ட, 20 முதல் 25 வயதிலான நான்கு இஸ்லாமியர்கள், தமிழகத்தில் ஊடுருவி உள்ளனர்.அவர்கள் இலங்கை பாஸ்போர்ட்டில், வியாபாரிகள் போர்வையில் பெங்களூரு, திருச்சி, திருவனந்தபுரம், சென்னை விமான நிலையங்கள் மூலம், தமிழகத்திற்குள் வந்துள்ளனர்.திருச்சி, மதுரை, சென்னை உள்ளிட்ட இடங்களில், ஏப்., 15 முதல் 17ம் தேதிகளுக்குள், குண்டுவெடிப்பு நடத்த திட்டமிட்டுள்ளனர். குறிப்பாக, பொதுமக்கள் அதிகம் கூடும் இடங்கள், முக்கிய தலைவர்கள் தேர்தல் பிரசாரம் மேற்கொள்ளும் இடங்கள் ஆகியவை, அவர்களின் இலக்குகளாக உள்ளன. அதனால், அனைத்து உளவுப் பிரிவு நிர்வாகங்களும், அதற்கு தலைமையேற்றுள்ள அதிகாரிகளும் இந்த விஷயத்தில் உஷாராகி, தக்க தடுப்பு நடவடிக்கை மேற்கொள்ள வேண்டும். துரதிர்ஷ்டமான சம்பவங்கள் நடக்காமல், பாதுகாப்பை பலப்படுத்த வேண்டும். சம்பந்தப்பட்ட இடங்களில், போதுமான எண்ணிக்கையில், போலீசாரை பாதுகாப்பிற்கு குவிக்க வேண்டும். இவ்வாறு அதில் தெரிவிக்கப்பட்டுள்ளது.மேலும், அந்த கடிதத்தில், ஏப்., 15 முதல் 17ம் தேதி வரையிலான மூன்று நாட்கள், 'ரெட் அலர்ட்'டாக குறிப்பிடப்பட்டு பாதுகாப்பு பலப்படுத்தப்பட வேண்டும் என, தனியாக கையெழுத்தில் குறிக்கப்பட்டுள்ளது.

கோட்டை விட்ட போலீஸ்:

இந்த கடிதம், கடந்த, ஏப்., 8ம் தேதி அனைத்து போலீஸ் உயரதிகாரிகள், உளவுத்துறை அதிகாரிகளுக்கு அனுப்பப்பட்டு விட்டது.ஆனால், போலீசார் போதிய பாதுகாப்பு நடவடிக்கையில் ஈடுபடாததால், பயங்கரவாதிகள் திட்டமிட்டபடி, நேற்று சென்ட்ரல் ரயில் நிலையத்தில் குண்டுவெடிப்பு நிகழ்த்தி, ஒரு அப்பாவி இளம்பெண்ணின் உயிரை பறித்துள்ளனர்.


நன்றி: தினமலர் 02/05/2014