எளிதாக தொழில் துவங்க ஏற்ற நாடுகள் பட்டியல்: மேக் இன் இந்தியாவால் முன்னேறுகிறது இந்தியா

புதுடில்லி: மேக் இன் இந்தியா திட்டத்தை பிரதமர் நரேந்திரமோடி அறிமுகப்படுத்தியதைத் தொடர்ந்து, எளிதாக தொழில் துவங்க ஏற்ற நாடுகள் குறித்த உலக வங்கியின் பட்டியலில் இந்தியா முன்னேறி வருகிறது.

பொருளாதார வளர்ச்சி பெற, உலக நாடுகளின் தொழில் நிறுவனங்களிடம் இருந்து அதிகமான முதலீட்டை இந்தியா எதிர்பார்க்கிறது. ஆனால், கடந்த காலங்களில் இந்தியாவில் தொழில் துவங்க சர்வதேச அளவிலான தொழில் நிறுவனங்கள் தயக்கம் காட்டி வந்தன. இதற்கு, தொழில் துவங்க இங்குள்ள கடுமையான நடைமுறைகளும், தடை தாமதங்களுமே காரணம். இதன் காரணமாக, எளிதாக தொழில் துவங்க ஏற்ற நாடுகள் குறித்த உலக வங்கியின் பட்டியலில் இந்தியா 134வது இடத்தில் இடம் பெற்றிருந்தது.

மோடியின் சூப்பர் திட்டம்:

மத்தியில் ஆட்சி மாற்றம் ஏற்பட்டு, நரேந்திரமோடி பிரதமராக பொறுப்பேற்ற பின்னர், பல அதிரடி திட்டங்கள் அறிவிக்கப்பட்டது. இதில், மேக் இன் இந்தியா திட்டம் முக்கியமானது. வௌிநாட்டு நிறுவனங்களை இந்தியாவில் முதலீடு செய்ய ஈர்க்கும் வகையிலான பல அம்சங்கள் இந்த திட்டத்தில் இடம் பெற்றுள்ளது. தொழில் துவங்குவதற்கான அனுமதி பெற குறைந்தபட்சம் 27 நாட்கள் ஆகும் என்ற நிலையை மாற்றி, ஒரே நாளில் அனுமதி அளிக்கும் வகையில் விதிமுறைகள் மாற்றப்பட்டன.

விதிமுறைகள் தளர்வு:

மேலும், சொத்து பதிவு, மின் இணைப்பு உள்ளிட்ட முக்கிய நிகழ்வுகளை விரைவாக முடிக்கும் வகையில், விதிமுறைகளில் தளர்வு செய்யப்பட்டது. முதலீட்டாளர்கள் எளிதாகவும், நட்புடனும் செயல்படும் வகையில், அனைத்து துறைகளிலும் ஒத்துழைப்பு வழங்க ஏற்பாடு செய்யப்பட்டுள்ளது.

துறைகளுக்கு உத்தரவு:

மத்திய தொழில் கொள்கை மற்றும் வளர்ச்சி துறையின் சார்பில், மத்திய அரசின் அனைத்து துறைகளும் முதலீட்டாளர்களுக்கு உதவும் வகையில், வேகமான சேவைகளை செய்து கொடுக்க வேண்டும் என உத்தரவிடப்பட்டது. 3 முதல் 6 மாதங்களுக்குள் இந்த நடைமுறையை அமலுக்கு கொண்டு வர வேண்டும் என்றும் கேட்டுக் கொள்ளப்பட்டுள்ளது. இதையடுத்து, சர்வதேச முதலீட்டாளர்களை கவரும் வகையில், விரைவான சேவை வழங்குவதற்கு மத்திய அரசு துறைகள் தற்போது தயாராகிவிட்டன. மேலும், மாநில அரசுகளும் இந்த விஷயத்தில் ஒத்துழைக்க வேண்டும் என்றும் கோரிக்கை வைக்கப்பட்டுள்ளது.

பட்டியலில் முன்னேற்றம்:

பிரதமர் நரேந்திரமோடியின் மேக் இன் இந்தியா திட்டம் செயல்பட துவங்கி உள்ளதால், எளிதாக தொழில் துவங்க ஏற்ற நாடுகள் பட்டியலில் இந்தியா முன்னேறி உள்ளது. கடந்த சில ஆண்டுகளாக அண்டை நாடுகளான சீனா, பாகிஸ்தான், வங்கதேசம் ஆகிய நாடுகளின் பின்னால் நின்று கொண்டிருந்த இந்தியா, மிக விரைவில் முதல் 50 நாடுகளில் ஒன்றாக இடம் பெறும் என எதிர்பார்க்கப்படுகிறது.

- தினமலர்

பகிர்வுக்கு நன்றி அண்ணா