உண்ணாவிரத மகத்துவம்

by முழுமுதலோன் Fri Aug 07, 2015 3:42 pm

உண்ணாவிரதம் இருப்பதன் பலன் மற்றும் மகத்துவம் குறித்து பல்வேறு மதங்களும் வற்புறுத்தி வருகின்றன. தங்கள் ஆரோக்கியம் காக்க விரும்புபவர்கள் குறிப்பிட்ட கால இடைவெளியில் உண்ணாவிரதம் இருப்பது பழக்கமாகவும் உள்ளது. அரசியல்வாதிகள் மற்றும் தொழிலாளர்கள் தங்கள் கோரிக்கைகளை வலியுறுத்தி அகிம்சை வழியில் உண்ணாவிரதம் இருப்பதும் உண்டு.ஆங்கிலேய ஆதிக்கத்தை எதிர்த்து மகாத்மா காந்தியடிகள் உண்ணாவிரதம் என்ற ஆயுதம் ஏந்தி போராடியது குறிப்பிடத்தக்கது. உண்ணாவிரதம் ஒரு மருத்துவ முறையாகவே இருந்து வந்திருக்கிறது. இது மிகப் புராதனமான இந்திய மருத்துவ முறை ஆகும். தற்போது நவீன அறிவியலும் உண்ணாவிரதத்தின் மகத்துவங்களை ஏற்றுக்கொண்டுள்ளது.

உண்ணாவிரதம் இருப்பது, பல நோய்களுக்கான மருத்துவ முறையாக நீண்ட காலத்துக்கு முன்பே இந்தியா, எகிப்து, கிரேக்கம் ஆகிய நாடுகளில் பின்பற்றப்பட்டு வந்தது. வரலாற்றுக்கு முற்பட்ட பண்டைக் காலத்திலும் மக்கள் இந்த முறையைக் கடைப்பிடித்தனர் என்பதற்கான சான்றுகளும் கிடைத்துள்ளன.சில விலங்குகள் கூட தமது உடல்நலம் கெட்டால்,அது சீரடையும் வரைதாமாகவே உணவு உண்பதை நிறுத்தி விடுவது ஆச்சரியத்துக்குரியது. இந்தியாவில் ஆயுர்வேத முறைப்படி உண்ணாவிரத சிகிச்சை பழங்காலத்தில் இருந்தே இருந்து வருகிறது.

உடலில் உள்ள நச்சுப் பொருட்களை முதலில் அகற்றுவதற்கான ஒரு வழிமுறையே உண்ணாவிரதம். அதைத் தொடர்ந்து, பின்னர் நோயைத் தீர்க்கப் பல்வேறு மருந்துகள் கொடுக்கப்படுகின்றன. உண்ணாவிரதம், யோகப் பயிற்சியிலும் ஓர் அங்கமாகும்.18-ம் நூற்றாண்டில், ரஷியா, மாஸ்கோ பல் கலைக்கழகப் பேராசிரியர்களானபிவெனியானோவ், ஸ்ராஸ்கி ஆகியோர், பல்வேறு வகையானநோய்களைத் தீர்ப்பதில் பட்டினிச் சிகிச்சையின் பயன்கள் குறித்து ஆய்வுகள் நடத்தி, நல்ல முடிவுகளை வெளியிட்டனர்.

வளர்சிதைமாற்றக்கோளாறுகள்,குறிப்பாக கொழுப்புப் பொருட்களின் வளர்சிதை மாற்றம், பல்வேறு ரத்த ஓட்ட மண்டல நோய்கள், நுரையீரல், ஆஸ்துமா, தோல் நோய்கள் ஆகியவற்றைக் குணப்படுத்துவதில்,கட்டுப்படுத்தப்பட்ட உண்ணாவிரத முறை அளிக்கும் பலன்கள் குறித்து ரஷிய மருத்துவரான நார்பகோன் தனது ஆய்வுக் கட்டுரையில் விளக்கமாக எழுதியிருக்கிறார்.

முன்சிறுகுடல் வளைவு, இரைப்பை ஆகியவற்றில் உள்ள புண்களை ஆற்றுவதில் உண்ணாவிரதச் சிகிச்சை முறையின் வெற்றிகள் பற்றி ஏ. பாகுலேவ் தனதுஆய்வுகளின் அடிப்படையில் தெரிவித்திருக்கிறார். பல ஆண்டுகளுக்கு முன்பிருந்தே ரஷியாவில் உண்ணாவிரத மருத்துவம் பெரிய அளவில் பின்பற்றப்பட்டு வருகிறது.தோல் தொடர்பான நோய்களுக்கு முக்கியமாக இம்முறை பயன்தருகிறது. மத அடிப்படையில் பின்பற்றப்படும் பல வழக்கங்கள், உண்மையில் நமது உடல் நலனுக்கானவை என்பதை இப்போது புரிந்து கொள்ளலாம்!

உடல்நலம்