இந்தோனீசியா: பயங்கரவாதத் தலைவரின் மாமனார் மீது வழக்கு

இந்தோனீசியா: பயங்கரவாதத் தலைவரின் மாமனார் மீது வழக்கு

Fri, 25/06/2010
கொல்லப்பட்ட மலேசியப் பயங்கரவாதத் தலைவர் நூர்தின் முகம்மது டாப்பின் மாமனார் மீதான வழக்கு இந்தோனீசியாவில் வியாழக்கிழமை தொடங்கியது.
நூர்தின் பிடிபடாமல் தப்பிக்க உதவியதாகக் குற்றம் சாட்டப்பட்ட 55 வயது பஹாருதீன் லத்திப் எனப்படும் பரிதினுக்கு 15 ஆண்டு வரை சிறைத் தண்டனை விதிக்கப்படலாம்.
சென்ற ஆண்டு ஜூலை மாதம் ஜகார்த்தாவிலுள்ள இரண்டு சொகுசு ஓட்டல்களில் தற்கொலை வெடிகுண்டுத் தாக்குதல்கள் நடந்தன.
எழுவர் கொல்லப்பட்ட அத்தாக்குதல் நடந்து ஐந்து மாதங்களுக்குப் பிறகு பரிதின் கைது செய்யப்பட்டார்.
“போலிசாரால் தேடப்பட்டு வந்த பயங்கரவாதியைப் போலிசாரின் பிடியிலிருந்து பாதுகாக்கும் நோக்கத்துடன் பரிதின் உதவியும் வசதியும் வழங்கினார்” என்று அரசாங்க வழக்குரைஞர் ஃபிர்மன்ஷியா நீதிமன்றத்தில் தெரிவித்தார்.
கடந்த செப்டம்பர் மாதம் போலிசார் நடத்திய திடீர் நடவடிக்கையில் நூர்தின் கொல்லப்பட்டார்.
மலாய் தீபகற்பத்தில் அல்-காய்தா பயங்கரவாத அமைப்பை வழிநடத்திச் சென்ற நூர்தின், இந்தோனீசியாவில் பல்வேறு கொடூரத் தாக்குதல்களையும் நடத்தினார்.
ஓட்டல் தாக்குதல், 2004ம் ஆண்டு வெடிகுண்டு நிரப்பிய லாரியுடன் ஆஸ்திரேலியத் தூதரகத்தில் நடந்த தாக்குதல் ஆகியவை இதில் உள்ளடங்கும் என்று ஏஎப்பி செய்தித் தகவல் கூறுகிறது.
பரிதின் 1995ம் ஆண்டு ஜமா இஸ்லாமியா பயங்கரவாத அமைப்பில் உறுப்பினராகச் சேர்ந்ததாக ஃபிர்மன்ஷியா தெரிவித்தார்.
கிழக்கு ஜாவா மாவட்டத்தில் 2000ம் ஆண்டு வட்டாரக் கிளைக்குத் தலைவராகவும் பரிதின் செயல்பட்டார்