பிளாக்பெர்ரியுடன் நாடுகள் மோதல்

by Guest Thu Aug 05, 2010 9:05 am

பிளாக்பெர்ரியுடன் நாடுகள் மோதல்


	பிளாக்பெர்ரி தொலைபேசி

சவுதியரேபியாவில் பிளாக்பெர்ரிரியின் இண்ஸ்டண்ட் மெஸ்ஸெஜிங் அதாவது உடனடித் தகவல் பரிமாற்ற சேவையினை வரும் வெள்ளிக்கிழமை முதல் இடைநிறுத்துவதாக அந்நாட்டின் அரசாங்கம் அறிவித்துள்ளது.

இந்தக் கருவிகளை தயாரிக்கும் கெனடிய நிறுவனமான ரிசர்ச் இன் மோஷன் சவுதி அரசாங்கம் உரிமம் வழங்குவதற்கான நிபந்தனைகளை ஏற்கும் வரை பிளாக்பெர்ரி சேவைகள் மீதான தடை நீடிக்கும் எனத் தெரிவிக்கப்படுகிறது.

பிளாக்பெர்ரி கருவிகளின் முக்கியச் சிறப்பம்சமாகச் சொல்லப்படுவது அதன் மூலமாக அனுப்பப்படுகின்ற தரவுகளின் பாதுகாப்புதான்.

அதனால்தான் தொழில்நிறுவனங்கள் மத்தியில் இந்தக் கருவி இவ்வளவு பிரபலம் அடைந்துள்ளது என்று சொல்லலாம்.

பிளாக்பெர்ரியைப் பயன்பாடுத்துவோர் இந்தக் கருவியின் மூலமாக அனுப்பும் இன்ஸ்டண்ட் மெஸ்ஸெஜிங் குறுந்தகவல்கள் மற்றும் மின் அஞ்சல்களை பெறுனர் தவிர இடையில் வேறு எவருமே பார்க்க முடியாது என்பதுதான் ரிசர்ச் இன் மோஷன் வழங்கிவரும் வாக்குறுதி ஆகும்.

தனிநபர் தகவல் பாதுகாப்பு தொடர்பில் பிளாக்பெர்ரி வழங்கும் இந்த உத்திரவாதம் அந்நிறுவனத்துக்கு அரசாங்கங்களுடன் பிரச்சினையைத் தோற்றுவித்து வருகிறது.

குற்றவாளிகள், பயங்கரவாதத் தாக்குதல் நடத்தத் திட்டமிடுபவர்கள், ஒரு நாட்டுக்கு அச்சுறுத்தலாக அமைந்துள்ள பிற சக்திகள் எல்லாம் இந்த செல் தொலைபேசி தரவுச் சேவைகளின் இரகசியத் தன்மையை தங்களுக்குச் சாதகமாகப் பயன்படுத்திக்கொள்கிறார்கள்.

இவற்றை தாங்கள் கண்காணிக்க வழியில்லாமல் போவது தேச பாதுகாப்பு குந்தகம் விளைவிக்கிறது என்று அரசாங்கங்கள் வாதிடுகின்றன.

அமெரிக்காவுக்கு மட்டும் ஏன் சலுகை ?


	பிளாக்பெர்ரியை பயன்படுத்தும் ஒபாமா

சவுதியரேபியா தற்சமயம் செய்துள்ளதுபோல, பிளாக்பெர்ரியின் தரவுப் பரிமாற்ற சேவைகளில் சிலவற்றை இந்த ஆண்டின் பிற்பகுதியில் இடைநிறுத்த எண்ணம் கொண்டுள்ளதாக ஐக்கிய அரபு எமிரேட் அரசாங்கமும் அறிவித்துள்ளது.

தனது தரவுச் சேவைகளைப் கண்காணிக்க அமெரிக்காவுக்கும் வேறு சில நாடுகளுக்கும் பிளாக்பெர்ரி நிறுவனம் வழங்கியுள்ள சலுகையை தங்களுக்கும் வழங்க வேண்டும் என்றுதான் தாங்கள் கேட்கிறோம் என வளைகுடா நாடுகள் கூறுகின்றன.

ஆனால் உலகில் எங்குமே அதிகாரிகள் தமது தரவுச் சேவைகளைக் ஒட்டுக்கேட்க தாங்கள் விசேட அனுமதி தந்திருக்கவில்லை என்று ரிசர்ச் இன் மோஷன் அறிவித்துள்ளது.