சென்னை விமான நிலையத்தில் போதை கும்பல் தலைவன் கைது - ரூ.60 கோடி கேட்டமைன் பறிமுதல்

மும்பையில் இருந்து சென்னை வழியாக மலேசியா, இந்தோனேசியா போன்ற நாடுகளுக்கு கேட்டமைன் போதைப்பொருளை ஒரு கும்பல் கடத்தி வருவதாக கி்டைத்த ரகசிய தகவலையடுத்து கூடுதல் தலைமை இயக்குனர் ராஜன் தலைமையில் வருவாய் புலனாய்வு குழுவினர் ஒரு வாரமாக சென்னை விமான நிலையத்தில் தீவிர கண்காணிப்பு பணியில் ஈடுபட்டனர்.

நேற்று முன்தினம் இரவு 11.30க்கு மும்பையில் இருந்து சென்னை வந்த இந்தியன் ஏர்லைன்ஸ் விமானத்தில் வந்திறங்கிய கொடுங்கையூர் எம்.ஆர்.நகரை சேர்ந்த ராஜபாண்டியனை (33) சோதனை செய்தனர்.

மகாராஷ்டிர மாநிலம் சிவண்டி என்ற இடத்தில் பிளாரன்ட் இண்டஸ் என்ற நிறுவனத்தில் இருந்து வடசென்னையில் உள்ள 7 லாரி நிறுவனங்களுக்கும் மும்பையில் உள்ள 2 லாரி நிறுவனங்களுக்கும் 600 கிலோ எடையுள்ள பொருட்களை தனித்தனி பெயர்களில் அனுப்பியதற்கான ரசீதுகள் அவரிடம் கைப்பற்றப்பட்டன.

600 கிலோ எடை உள்ள மருந்துகள், கெமிக்கல், குழந்தை உணவுப் பொருட்கள் என்ற பெயரில் பதிவு செய்யப்பட்டிருந்தன. இதையடுத்து, அதிகாரிகள் வடசென்னை பகுதியில் உள்ள 7 லாரி ஷெட்களிலும் சோதனை நடத்தி, ராஜபாண்டியன் அனுப்பிய பார்சல்களை கைப்பற்றினர். அதில் மூட்டை மூட்டையாக கேட்டமைன் என்ற போதைப் பொருட்கள் இருந்தன. 500 கிலோ போதைப் பொருளை கைப்பற்றினர். அதோடு மும்பையில் உள்ள மற்ற 2 லாரி ஷெட்களிலும் அங்குள்ள மத்திய வருவாய் புலனாய்வு துறையினர் சோதனை நடத்தியதில் 100 கிலோ கேட்டமைன் கைப்பற்றப்பட்டது.

மத்திய வருவாய் புலனாய்வு துறை கூடுதல் தலைமை இயக்குனர் ராஜன் கூறுகையில், மொத்தம் 600 கிலோ கேட்டமைன் கைப்பற்றப்பட்டது. சர்வதேச சந்தையில் அதன் மதிப்பு ரூ.60 கோடி ஆகும். சென்னை வருவாய் புலனாய்வு பிரிவினர் இதுவரை கைப்பற்றியுள்ள கேட்டமைன் போதைபொருள்களின் இதுதான் அதிகபட்ச அளவு ஆகும்.

கடத்தலின் முக்கிய புள்ளியான எஸ்.பி.பாண்டியன் கைது செய்யப்பட்டுள்ளார். அவருக்குப் பின்னால் பெரிய கும்பல் ஒன்று இருக்கும் என்று சந்தேகிக்கிறோம். அந்த கும்பலைப் பிடிக்க சிறப்பு படை அமைக்கப்பட்டுள்ளது. கேட்டமைன் போதைபொருள் மும்பையில் இருந்து கடத்தி கொண்டுவரப்பட்டுள்ளதால் அது தயாரிக்கப்படும் தொழிற்சாலையை கண்டுபிடிக்கும் பணியில் மும்பை அதிகாரிகள் ஈடுபட்டுள்ளார்கள்.

கேட்டமைன் போதைப்பொருளை குளிர்பானங்களில் போட்டு குடித்தால் 3 அல்லது 4 மணி நேரம் போதை தரும். அதை அளவுக்கு அதிகமாக பயன்படுத்தினால் உயிருக்குகூட ஆபத்து ஏற்படலாம். ஒரு கிலோ கேட்டமைன் விலை ரூ.35 ஆயிரம் ஆகும். மலேசியா, இந்தோனேசியா உள்ளிட்ட நாடுகளில் அதன் விலை ரூ.10 லட்சம் ஆகும். எனவே, இங்கிருந்து கடத்திக்கொண்டுபோய் அங்கு விற்பனை செய்கிறார்கள் என்று கூறினார்.