பெட்ரோல் லிட்டருக்கு 10 காசு, டீசல் விலை 9 காசு உயர்வு: நள்ளிரவு முதல் அமல்

புதுதில்லி, செப்.8 பெட்ரோல் மற்றும் டீசல் விலை நேற்று (செப்.7) நள்ளிரவு முதல் லிட்டருக்கு சராசரியாக 10 பைசா உயர்ந்துள்ளது.

பெட்ரோல் பம்ப் டீலர்களுக்கு வழங்கப்படும் கமிஷன் உயர்த்தப்பட்டுள்ளதால் விலை உயர்வு ஏற்பட்டுள்ளது. தில்லியில் பெட்ரோல் விலை லிட்டருக்கு 11 பைசாவும் (51.56), டீசல் 9 பைசாவும் (37.71) உயர்ந்துள்ளது. நாட்டின் இதர பகுதிகளில் இந்த விலை உயர்வு பெட்ரோலுக்கு லிட்டருக்கு 11-லிருந்து 12 பைசா வரையிலும், டீசலுக்கு 9லிருந்து 10 பைசா வரையிலும் உயர்ந்துள்ளது.

சர்வதேச சந்தையில் கச்சா எண்ணெய் விலையில் ஏற்படும் மாற்றத்துக்கு ஏற்ப, அவ்வப்போது பெட்ரோல், டீசல் ஆகியவற்றின் விலை மாற்றி அமைக்கப்படுகிறது.

இந்த நிலையில் பெட்ரோல் பம்ப் டீலர்களுக்கு வழங்கப்படும் கமிஷன் தொகையை உயர்த்த மத்திய அரசு முடிவு செய்தது. இதைத்தொடர்ந்து பெட்ரோல், டீசல் ஆகியவற்றின் விலையை மத்திய அரசு நேற்று சிறிது உயர்த்தியது.

அதன்படி, நாடு முழுவதும் பெட்ரோல் விலை லிட்டருக்கு 11 முதல் 12 காசு வரையும், டீசல் விலை லிட்டருக்கு 9 முதல் 10 காசு வரையும் உயர்த்தப்பட்டது.

சென்னையில் பெட்ரோல் விலை லிட்டருக்கு 10 காசு உயர்ந்தது. இதைத்தொடர்ந்து, சென்னையில் 55 ரூபாய் 92 காசாக இருந்த ஒரு லிட்டர் பெட்ரோலின் விலை 56 ரூபாய் 2 காசாக உயர்ந்தது. இதேபோல் டீசல் விலை லிட்டருக்கு 9 காசு உயர்ந்தது. இதனால், 40 ரூபாய் 7 காசாக இருந்த ஒரு லிட்டர் டீசலின் விலை, 40 ரூபாய் 16 காசாக அதிகரித்தது.

தில்லியில் பெட்ரோல் விலை 11 காசு உயர்ந்து லிட்டருக்கு 51 ரூபாய் 56 காசு ஆனது. இதேபோல் டீசல் விலை 9 காசு உயர்ந்து லிட்டருக்கு 37 ரூபாய் 71 காசு ஆனது. இந்த விலை உயர்வு நேற்று நள்ளிரவு முதல் அமலுக்கு வந்தது.