கூவி... கூவி... விற்கப்படும் கழுதை பால்: வயிற்றில் கட்டி உருவாகும் அச்சம்

சிவகங்கை:கழுதை பாலை குடிப்பதால் குழந்தைகள் வயிற்றில் ஒருவித கட்டி உருவாகும் அச்சம் நீடித்து வருகிறது. சிவகங்கையில் கடந்த சில நாட்களாக கழுதை பால் விற்பனை நடக்கிறது. இப்பாலை குழந்தைகளுக்கு தொடர்ந்து 25 நாட்களுக்கு கொடுத்தால் சளி, இருமல், பால் கக்குதல் போன்று உடல் உபாதைகள் ஏற்படாது. பெரியவர்கள் குடித்தால் சளி சம்பந்தப்பட்ட நோய்கள் அண்டாது என கூறி விற்கின்றனர். இதற்காக, விருத்தாச்சலம் அருகே நாச்சியார் ஜங்ஷனை சேர்ந்த சில குடும்பத்தினர், கழுதைகளுடன் இங்கு குடியேறியுள்ளனர். காலை நேரங்களில் தெரு, தெருவாக கழுதை யுடன் பால்... பால்... என கூவி... கூவி விற்கின்றனர். கழுதை பால் 100 மி.லி., 60 ரூபாய்க்கு விற்கப்படுகிறது. சிறு குழந்தைகளுக்கு வழங்க ஒரு பால் சங்கிற்கு 20 ரூபாய் வசூலிக்கப்படுகிறது. இதை நம்பி, நகரில் ஏராளமான குழந்தை களுக்கு பெற்றோர்களே வழங்கி வருகின்றனர்.



பால் விற்கும் விருத்தாச்சலத்தை சேர்ந்த கல்யாணி கூறுகையில், "" விருத்தாச்சலத்தில் இருந்து ஒவ்வொரு மாவட்டமாக கழுதையுடன் வந்து பால் விற்பனை செய்கிறோம். குழந்தை களுக்கு உடல் ரீதியாக நல்லது என்பதால், இதை விரும்பி வாங்குகின்றனர். நாள் ஒன்றுக்கு 200 ரூபாய் வரை வருமானம் கிடைக்கும்,'' என்றார்.அரசு மருத்துவமனை குழந்தைகள் டாக்டர் சபரிராஜன் கூறுகையில், ""கழுதை பாலை குழந்தைகளுக்கு கொடுப்பது தவறு. இதை குடித்தால், டி.பி., கட்டி போன்று "புருசெல்லோஸ்' என்ற ஒருவகை கட்டி வயிற்றில் உருவாகி, குழந்தையின் வளர்ச்சியை பாதிக்கும்,'' என்றார்.

:112: