உத்தரபிரதேசத்தில் 45 நாட்களில் 4 பத்திரிகையாளர்கள் படுகொலை

by Muthumohamed Wed Aug 28, 2013 6:50 pm

லக்னோ,

உத்தரபிரதேச மாநிலத்தில் சில தினங்களுக்கு முன் காணாமல் போன பத்திரிகையாளர் நேற்று புலந்த்ஷஹர் பகுதியில் சாக்குமூட்டைக்குள் பிணமாக கிடந்தார்.

ஜகாவுல்லா(28) என்ற அந்த பத்திரிகையாளர் கடந்த வெள்ளிக்கிழமை முதல் திடீரென்று காணாமல் போனார். புலந்த்ஷஹர் மாவட்டத்தின் குஜ்ரா நகரில் வசித்து வந்த அவரது பிணம் கோத்வாலி தெஹத் போலீஸ் நிலைய எல்லைக்குட்பட்ட சோளா பகுதியில் நேற்று சாக்குமூட்டைக்குள் கண்டெடுக்கப்பட்டது.

அவரது உடல் முழுக்க இருந்த காயங்களை வைத்து, ஜக்கியுல்லா அடித்துக் கொல்லப்பட்டிருக்கலாம் என போலீசார் தெரிவித்தனர்.

கடந்த வெள்ளிக்கிழமை எடவா மாவட்டத்தில் மோட்டார் சைக்கிளில் வந்த மர்மநபர்கள், இந்தி நாளிதழின் மூத்த நிருபராக பணியாற்றிய ராகேஷ் ஷர்மா(50) என்பவரை துப்பாக்கியால சுட்டுக்கொன்றனர்.

இந்த படுகொலைக்கு சில தினங்களுக்கு முன்னர் பண்டா மாவட்டத்தில் ஒரு பத்திரிகையாளரும், லக்கிம்பூர் மாவட்டத்தில் மற்றொரு பத்திரிகையாளரும் படுகொலை செய்யப்பட்டனர்.

உத்தரபிரதேச மாநிலத்தில் கடந்த 45 நாட்களில் மட்டும் 4 பத்திரிகையாளர்கள் கொல்லப்பட்டுள்ளனர்.

இந்த படுகொலைகளுக்கு கண்டனம் தெரிவித்துள்ள உத்தரபிரதேசம் பத்திரிகையாளர்கள் சங்கம், 'இதுபோன்ற படுகொலைகளை தடுக்காமல் போனால் புலனாய்வு மற்றும் செய்தி சேகரிப்பு பணியில் ஈடுபட்டிருக்கும் பத்திரிகையாளர்களுக்கு பாதுகாப்பற்ற நிலை உருவாகி விடும்.

எனவே, முதல் மந்திரி அகிலேஷ் யாதவ் இவ்விவகாரத்தில் தலையிட்டு குற்றவாளிகள் மீது உடனடியாக நடவடிக்கை எடுக்க உத்தரவிட வேண்டும்' என்று கூறியுள்ளது.