பெங்களூர்,பாட்னா ரயிலில் மயக்க நிலையில் 10 பேர் மீட்பு

by பகவதி Wed Sep 05, 2012 7:49 pm

திருப்பத்தூர்: பெங்களூர்,பாட்னா செல்லும் ரயில் நேற்று காலை 9 மணிக்கு பெங்களூரில் இருந்து ஜோலார்பேட்டை சென்று கொண்டிருந்தது. அப்போது, அந்த ரயிலில் பயணம் செய்த 7 பேர் மயக்க நிலையில் உள்ளதாக ரயில்வே போலீசாருக்கு பயணிகள் தகவல் தெரிவித்தனர்.ஜோலார்பேட்டைக்கு காலை 11.20 மணிக்கு ரயில் வந்ததும், அந்த 7 பேரையும் ரயில்வே போலீசார் மீட்டு, சிகிச்சைக்காக திருப்பத்தூர் அரசு மருத்துவமனையில் சேர்த்தனர். முதலுதவி சிகிச்சை அளிக்கப் பட்ட பிறகு, அவர்களிடம் திருப்பத்தூர் டிஎஸ்பி நாகராஜன் விசாரணை நடத்தினார். விசாரணையில், உத்தரபிரதேசத்தை சேர்ந்த பால்உதாப் திவாரி மகன் சந்திப் (22), பனாரஸ் டாவாரியூரை சேர்ந்த பசில்தார் மகன் சந்திப்குமார் (25), பாட்னா மாநிலம் தானேகூர் பஹார் யாதவ் மகன் அணில் (18), பீகார் மாநிலத்தை சேர்ந்த சைலாஸ் மகன் குண்டு (23) என்பது தெரியவந்தது. விசாரணையில், 4 பேரின் பெயர் மட்டும் தெரிந்தது, ரயிலில் பயணம் செய்யும்போது யாரோ மர்ம ஆசாமி, அவர்களுக்கு குளிர்பானம் கொடுத்ததாகவும், அதை குடித்தபோது மயக்கமடைந்ததாகவும் அவர்கள் தெரிவித்தனர். ஆனால், அவர்கள் மாற்றி மாற்றி தகவல்களை தெரிவித்து மயக்க நிலைக்கு சென்றுவிடுவதால், போலீசார் குழப்பமடைந்துள்ளனர்.மேலும், இதேபோல் 3 பேர் மயக்க நிலையில் கர்நாடக மாநிலம் பங்காருபேட்டை ரயில் நிலையத்தில் இறக்கப்பட்டு, மருத்துவமனையில் சேர்க்கப்பட்டுள்ளதாக கூறப்படுகிறது. மொத்தம் 10 பேர் மயக்கமடைந்திருப்பது தெரியவந்துள்ளது.திருப்பத்தூர் அரசு மருத்துவமனையில் சிகிச்சை பெற்று வருபவர்களிடம், ரயில்வே எஸ்பி கயல்விழி விசாரணை நடத்தினார்.

தினகரன்