கார் மீது லாரி மோதல்: 6 பேர் நசுங்கி சாவு

by mohamed Thu May 06, 2010 11:15 pm

கார் மீது லாரி மோதிய பயங்கர விபத்தில் நீலகிரி மாவட்ட மனித நேய மக்கள் கட்சி மாவட்ட செயலாளர் உள்பட 6 பேர் உடல் நசுங்கி செத்தனர்.

நீலகிரி மாவட்டம் காந்தல் பகுதியை சேர்ந்தவர் ஷேக் அப்துல்லா (வயது 38). இவர் மனித நேய மக்கள் கட்சியின் நீலகிரி மாவட்ட செயலாளராக இருந்தார்.

அதே பகுதியை சேர்ந்த சையது சாதிக் (37), அப்துல் கனி (42), யாசான் (22), மத்தின் (32), சபியுல்லா (32). ஆகியோர் மனித நேய மக்கள் கட்சியின் நிர்வாகிகள்.

இவர்கள் 6 பேரும் ஷேக் அப்துல்லாவிற்கு சொந்தமான காரில் திருச்சிக்கு நிலம் வாங்க வந்தனர்.

பின்னர் வேலை முடிந்து திருச்சியில் இருந்து கரூர் மாவட்டம் பாளையம் வழியாக ஊட்டி செல்வதற்காக காரில் புறப்பட்டு வந்தனர். காரை சபியுல்லா ஓட்டி வந்தார்.

இந்த கார், கரூர் மாவட்டம் சிந்தாமணிப்பட்டி போலீஸ் சரகம் சரசம்பட்டி அருகே வந்த போது எதிரே பாளையத்தில் இருந்து அரியலூர் செல்வதற்காக ஜல்லி பாரம் ஏற்றிக்கொண்டு ஒரு லாரி வந்தது.

லாரியை திருச்சி மாவட்டம் கள்ளக்குடியை சேர்ந்த ஆரோக்கியராஜ் (35) ஓட்டி வந்தார். திடீர் என்று லாரியின் அச்சு முறிந்தது. இதனால் லாரி, டிரைவரின் கட்டுப்பாட்டை இழந்து ரோட்டில் அங்கும், இங்குமாக தறிகெட்டு ஓடியது. இதில் எதிரே வந்து கொண்டிருந்த கார் மீது லாரி பயங்கரமாக மோதியது.

மோதிய வேகத்தில் காரை சிறிது தூரம் லாரி இழுத்து சென்றது. பின்னர் ரோட்டின் ஓரம் உள்ள ஒரு கிணற்றின் அருகே கார் மீது லாரி ஒரு பக்கமாக ஏறி நின்றது. கார் கிணற்றின் ஓரத்தில் தொங்கிக் கொண்டு இருந்தது.

இந்த விபத்தில் காரின் முன்பகுதி அப்பளம் போல் நொறுங்கி விட்டது. காரில் இருந்த 6 பேரும் படுகாயம் அடைந்தனர். அவர்கள் காப்பாற்றுங்கள், காப்பாற்றுங்கள் என்று சத்தம் போட்டனர். சத்தம் கேட்டு அக்கம்-பக்கத்தினர் சம்பவ இடத்திற்கு ஓடிவந்தனர்.

ஆனால் சிறிது நேரத்திலேயே ஷேக் அப்துல்லா, சையது சாதிக், அப்துல் கனி, யாசான், மத்தின், சபியுல்லா ஆகிய 6 பேரும் துடி,துடித்து செத்தனர்.

லாரி இழுத்து சென்றதால் கார் சுக்குநூறாக நொறுங்கி கிடந்தது. இதனால் பலியான 6 பேரின் உடல்களை மீட்பதற்கு சிரமம் ஏற்பட்டது. தீயணைப்பு துறையினர் சம்பவ இடத்திற்கு சென்று காரை உடைத்து அதில் இருந்த 6 பேரின் பிணத்தை கைப்பற்றி பிரேத பரிசோதனைக்கு கரூர் அரசு ஆஸ்பத்திரிக்கு அனுப்பி வைத்தனர்.

விபத்து நடந்த உடன் காரில் இருந்த ஒரு செல்போனை எடுத்து தொடர்பு கொண்ட போது தான் பலியானவர்கள் நீலகிரி மாவட்டத்தை சேர்ந்தவர்கள் என்பது தெரிய வந்தது.

இதைத்தொடர்ந்து அவர்களின் உறவினர்களுக்கு தகவல் கொடுக்கப்பட்டது. விபத்து நடந்தவுடன் லாரி டிரைவர் அங்கிருந்து தப்பி ஓடிவிட்டார். பின்னர் மாலையில் போலீஸ் துணை சூப்பிரண்டு முன்னிலையில் நேரில் சரண் அடைந்தார். இதுகுறித்து போலீசார் வழக்குப்பதிவு செய்து விசாரணை நடத்தி வருகிறார்கள்.