பனீர் பட்டர் மசாலா

எனக்கு பனீர் பட்டர் மசாலா மற்றும் நான் அல்லது ரொட்டி சாப்பிட ரொம்ப பிடிக்கும். இதற்காகவே அடிக்கடி ஹோட்டல் சரவணாபவன் செல்வேன். இங்கே உங்களுக்கு அதன் செய்முறையை கொடுக்கிறேன் - சங்கர்

தேவையான பொருள்கள்:

பனீர் - ஒரு பாக்கெட்
வெங்காயம் - ஒன்று
தக்காளி - ஒன்று
இஞ்சி பூண்டு விழுது - ஒரு தேக்கரண்டி
மிளகாய் தூள் - 3/4 தேக்கரண்டி
கரம் மசாலா தூள் - அரை தேக்கரண்டி
குடை மிளகாய் - பாதி
கொத்தமல்லி - சிறிதளவு
முந்திரி - 10
சீரகம் - ஒரு தேக்கரண்டி
உப்பு, எண்ணெய், பட்டர்(விரும்பினால்) - தேவையான அளவு

செய்முறை:
வெங்காயம், தக்காளி, குடைமிளகாய், கொத்தமல்லி தழை ஆகியவற்றை பொடியாக நறுக்கிக் கொள்ளவும். முந்திரியை ஊற வைத்து அரைத்துக் கொள்ளவும்.

ஒரு வாணலியில் எண்ணெய் விட்டு வெங்காயம், தக்காளியை வதக்கி ஆறியதும் மிக்ஸியில் விழுதாக அரைத்துக் கொள்ளவும்.

கடாயில் எண்ணெய் விட்டு பனீர் துண்டுகளை பொரித்து எடுத்துக் கொள்ளவும்.

கடாயில் எண்ணெய் அல்லது பட்டர் போட்டு சீரகம் தாளித்து குடைமிளகாயை சேர்த்து வதக்கவும். எண்ணெய் உபயோகிப்பவர்கள் பனீர் பொரித்த எண்ணெயையே பயன்படுத்திக் கொள்ளலாம்.

குடை மிளகாய் வதங்கியதும் அரைத்து வைத்துள்ள வெங்காய தக்காளி விழுது, உப்பு சேர்த்து நன்கு வதக்கவும்.

பின்பு இஞ்சி, பூண்டு விழுது சேர்த்து பச்சை வாசம் போக வதக்கவும்.

பச்சை வாசம் அடங்கியதும் மிளகாய் தூள் சேர்த்து எண்ணெய் பிரியும் வரை வதக்கவும்.

பின்பு பனீர் துண்டுகளை போட்டு கிளறி தண்ணீர் சேர்த்து கொதிக்க விடவும்.

தூள் வாசம் அடங்கியதும் அரைத்து வைத்த முந்திரி விழுது, கரம் மசாலா சேர்க்கவும்.

நன்கு கொதித்து கிரேவி பதம் வந்ததும் கொத்தமல்லி தழை தூவி இறக்கவும். விரும்பினால் கடைசியில் சிறிது பட்டர் சேர்த்து கொள்ளலாம்

இப்போது சுவையான பனீர் பட்டர் மசாலா ரெடி. பரோட்டா, சப்பாத்தி, பூரி, நாண் உடன் சாப்பிட அருமையாக இருக்கும். இன்னும் கொஞ்சம் ரிச் டேஸ்ட் விரும்புகிறவர்கள் கடைசியில் சிறிது ப்ரஷ் க்ரீம் சேர்க்கலாம்.

நன்றி அறுசுவை

பகிர்ந்தமைக்கு நன்றி அண்ணா

படிக்கும் போதே சாப்பிடனும்னு தோனுதே........ நன்றி அண்ணா பகிர்ந்தமைக்கு

நன்றி சங்கர்

நல்லா இருக்கும் போலருக்கே
பகிர்வுக்கு நன்றி சங்கர்