யார் வேலைக்காரன்? - சிறுகதை

ஒரு தேசத்தின் அரசன் பொது இடமொன்றில் தனது பிரஜைகளுடன் பேசும்பொழுது, தான் இந்தத் தேசத்தின் அரசனானதால் தன்னைத்தவிர மற்றவர்கள் அனைவரும் வேலைக்காரர்கள் என்றும் அதை எப்பொழுதும் மறக்கக்கூடாது என்றும் சொன்னான்.

அங்கே பின்னால் கைத்தடியுடன் இருந்த முதியவர் அரசன் முன்னே வந்து “தாங்கள் சொல்வது சரியல்ல. அனைவரும் ஒருவருக்கொருவர் வேலைக்காரர்களே. அதில் எள்ளளவும் ஐயமில்லை’ என்றும் சொன்னார்.
அதைக்கேட்ட அரசனுக்கோ கடும்கோபம் வந்து விட்டது. “அதெப்படி என் பேச்சை மறுத்துப் பேசுகிறீர். உமது வாதம் தவறானது. ஆனாலும் தாங்கம் முதியவர் என்பதால் தங்களை முழுமனதுடன் மன்னிக்கிறேன்’ என்றும் கூறினார் அரசன்.

உடனே முதியவர் “அரசே எனது கூற்று சரியானதே என்னால் அதை நிரூபிக்க முடியும்’ என்று கூறினார். அரசனும் “சரி நிரூபியுங்கள். ஒரு வேளை தாங்கள் நிரூபிக்கத் தவறினால் தங்களுக்கு தகுந்த தண்டனை கிடைக்கும்’ என்றும் எச்சரித்தான்.

ஆனாலும் முதியவர் அதைச் சவாலாக ஏற்றுக் கொண்டு “அரசே தாங்கள் சற்று நேரம் எனது கைத்தடியைத் தாங்கிக் கொள்ளுங்கள். நான் எனது வேட்டியைச் சரி செய்து கொள்கிறேன்’ என்று சொன்னவுடன், அரசனும் முதியவரின் தடியை வாங்கித் தனது தோளில் தாங்கிக் கொண்டான்.
முதியவரும் நிதானமாகத் தனது வேட்டியைச் சரி செய்துகொண்டு சற்று நேரத்திற்குப் பின் அரசனிடமிருந்து தடியை வாங்கிக் கொண்டு சொன்னார். “அரசே நான் என் சவாலில் ஜெயித்து விட்டேன்’ என்று ஆரவாரமாக கூறினார்
.
அரசன் “அதெப்படி?’ என்று கேட்டான்.

“சில வினாடிகள் தாங்கள் எனது கைத்தடியைத் தாங்கிக் கொண்டிருந்தீர்கள். அதனால் தாங்களும் ஒரு வேலைக்காரர்தான்’ என்று முதியவர் திட்டவட்டமாகச் சொன்னார்.
அரசன் முதியவின் சாதுரிய புத்தியைப் புகழ்ந்து விட்டு, அன்று முதல் அந்த முதியவரையும் ஒரு முக்கிய ஆலோசகராக நியமித்துக் கொண்டான்.


மஞ்சரி

கதை அருமை. மிக்க நன்றி தம்பி