விஷமாக அறிவிக்கப்பட்டது அமிலம்

சென்னை: வீடுகள், மருத்துவமனைகள், ரசாயன தொழிற்சாலைகளில் பயன்படுத்தப்படும் அமிலங்களின் விற்பனை தொடர்பாக, தமிழக அரசு, புதிய நடைமுறைகளை அறிவித்துள்ளது. அதன்படி, விஷம் பட்டியலில், இந்த அமிலங்கள் சேர்க்கப்பட்டுள்ளன.

காரைக்காலை சேர்ந்த வினோதினி, ஒரு தலைக்காதல் காரணமாக, அமிலம் வீசப்பட்டு படுகாயம் அடைந்து, சிகிச்சைப் பலனின்றி இறந்தார். சென்னையை சேர்ந்த திவ்யா என்பவரும், அமில வீச்சில் படுகாயம் அடைந்தார். வட மாநிலங்களிலும் அமிலம் வீச்சு சம்பவங்கள் நடந்தன. இதைத் தொடர்ந்து, அமிலம் விற்பனை தொடர்பாக பல்வேறு கட்டுப்பாடுகளை, மத்திய மாநில அரசுகள் அறிவித்தன. அந்த வகையில், தற்போது அமிலம் விற்பனை தொடர்பாக, தமிழக அரசு, புதிய நிபந்தனைகளை அறிவித்துள்ளது.

இது குறித்து, தமிழக அரசின் உள்துறை முதன்மை செயலர் அபூர்வா வர்மா வெளியிட்டுள்ள உத்தரவு: மத்திய அரசின், 1919 ம் ஆண்டின் விஷப்பொருட்கள் சட்டப்படி, அமிலம், விஷப் பொருளாக கருதப்படுகிறது. இதை விற்பனை செய்வோருக்கான உரிமத்தை, மாவட்ட நீதிபதி அளவிலான அதிகாரிகள் வழங்குகின்றனர். அமிலத்தை கல்வி நிறுவனங்கள், ஆராய்ச்சி நிறுவனங்கள், மருத்துவ நிறுவனங்கள், மருத்துவமனைகள், தொழிலகங்கள், அரசுத் துறையினர், தனியாருக்கு, உரிமம் பெற்ற விற்பனையாளர்கள் மட்டுமே, விற்பனை செய்ய வேண்டும். அமிலத்தை வாங்குவோரும், புகைப்படம் ஒட்டப்பட்ட அடையாள அட்டையின் நகலை, விற்பனையாளரிடம் கொடுத்தால் மட்டுமே, பொருளைப் பெற முடியும்; 18 வயதுக்குட்பட்டோர், அமிலம் வாங்க அனுமதிக்கப்பட மாட்டார்கள். அமிலம் விற்கும் நிறுவனங்களை, மாவட்ட நீதிபதி, மருந்து கட்டுப்பாட்டு அலுவலர், காவல்துறை அதிகாரிகள், உதவி மருத்துவ அலுவலர் உள்ளிட்ட அதிகாரிகள், எந்த நேரத்திலும் ஆய்வு செய்யலாம். பதிவேட்டுக்கும், இருப்புக்கும் வித்தியாசம் இருந்தால், கடும் நடவடிக்கை எடுக்கலாம். மேலும், அமிலத்தை, பாதுகாப்பான கொள்கலன்களில் வைத்து, அதன் மீது, 'விஷம்' என்ற எச்சரிக்கை வாசகத்தை, எழுதியிருக்க வேண்டும். இவ்வாறு அந்த உத்தரவில் தெரிவிக்கப்பட்டுள்ளது.

விஷப் பட்டியலில் சேர்க்கப்பட்டுள்ள அமிலங்கள்:

எடையில், 25 சதவீத அடர்வை மீறிய அசிட்டிக், அசிட்டிக் அன்ஹைட்ரைடு, 5 சதவீத அடர்வை மீறிய சல்ப்யூரிக், 5 சதவீத அடர்வை மீறிய ஹைட்ரோகுளோரிக், பாஸ்போரிக், ஹைட்ரோபுளூரிக், பெர்கால்ரிக், 10 சதவீத அடர்வை மீறிய பார்மிக், ஹைட்ரோசயானிக், நைட்ரிக், ஆக்சாலிக், பாதரச பெர்குளோரைடு, பொட்டாசியம் ஹைட்ராக்சைடு, சோடியம் ஹைட்ராக்சைடு, 50 சதவீத அடர்த்தியை மீறிய ஹைட்ரஜன் பொராக்சைடு, 25 சதவீத அடர்வை மீறிய பார்மால்டிஹைடு, 3 சதவீத அடர்வை மீறிய பினால், சோடியம் ஹைட்ரோகுளோரைடு சொல்யூஷன் என, 19 வகையான அமிலங்களை, விஷம் பட்டியலில், அரசு சேர்த்துள்ளது.

நன்றி: தினமலர்.

அறியத்தந்தமைக்கு நன்றி

பகிர்வுக்கு நன்றி அண்ணா