நிதி வசதி ஏற்படும்போது வாகன, தனிநபர், கிரெடிட் கார்டு கடனை முன்கூட்டியே செலுத்துவது நல்லது நிபுணர்கள

[You must be registered and logged in to see this image.]

நிதி வசதி ஏற்படும்போது மோட்டார் வாகனம், தனிநபர், கிரெடிட் கார்டு கடன்களை முன்கூட்டியே செலுத்துவது சிறந்தது என ஆய்வாளர்கள் தெரிவித்துள்ளனர்.

அபராத கட்டணம்

மாறுபடும் வட்டி விகிதத்திலான வீட்டுக்கடனை முன்கூட்டியே திரும்ப செலுத்தினால் அதற்கு வாடிக்கையாளர்களிடம் அபராத கட்டணம் விதிப்பதை ரிசர்வ் வங்கி ஏற்கனவே ரத்து செய்துள்ளது. இதேபோன்று மோட்டார் வாகனம், கல்விக் கடன், தனிநபர் கடன் போன்ற கடன்களை முன்கூட்டியே செலுத்தினால் அபராதம் விதிக்கக் கூடாது என ரிசர்வ் வங்கி இம்மாதம் 1–ந் தேதி வெளியிட்ட ஆய்வு அறிக்கையில் வங்கிகளுக்கு ஆலோசனை தெரிவித்துள்ளது. இதனை வங்கிகள் செயல்படுத்த தவறினால் இது கட்டாய சட்டமாக்கப்படும் எனவும் ரிசர்வ் வங்கி தெரிவித்துள்ளது.

தற்போது, தனிநபர் கடனிற்கான வட்டி விகிதம் 13–20 சதவீதமாக உள்ளது. முன்கூட்டியே கடனை செலுத்தினால் 0.5 சதவீதம் முதல் 5 சதவீதம் வரை அபராத கட்டணம் விதிக்கப்படுகிறது. கார் கடனிற்கான வட்டி விகிதம் 5 முதல் 15 சதவீதமாகவும், முன்கூட்டியே செலுத்தினால் விதிக்கப்படும் அபராத கட்டணம் 3 முதல் 5 சதவீதமாகவும் உள்ளது.

ரிசர்வ் வங்கி

ரிசர்வ் வங்கியின் ஆலோசனை ஏற்கப்பட்டு அபராத கட்டணம் ரத்து செய்யப்படும் நிலையில் மோட்டார் வாகனம், கல்வி, தனிநபர் கடன் பெற்றுள்ள வாடிக்கையாளர்கள் பயன்பெறுவார்கள். அவர்கள் குறைந்த வட்டிக்கு கடன் வழங்கும் வேறு வங்கிக்கு கடனை எளிதில் மாற்றி விடலாம்.

அதேசமயம், அபராத கட்டணம் ரத்து செய்யப்படும் வரை காத்திருக்காமல் வாகன, தனிநபர், கிரெடிட் கார்டு கடன்களை முன்கூட்டியே திரும்ப செலுத்தலாம் என ஆய்வாளர்கள் தெரிவித்துள்ளனர்.

ஏப்ரல், மே மாதங்களில் பல நிறுவனங்கள் பணியாளர்களுக்கு ஊதிய உயர்வு மற்றும் போனஸ் வழங்க உள்ளன. இந்த தொகையை கடனை முன்கூட்டியே செலுத்த பயன்படுத்திக் கொள்ளலாம். அதேசமயம், ஆறு மாதங்களுக்கான அவசர தேவைக்கான நிதியை ஒதுக்கி வைத்துவிட்டு அதன் பிறகுதான் கடனை திரும்ப செலுத்த வேண்டும். மேலும், காப்பீட்டு வசதி போதுமான அளவிற்கு இல்லையென்றால் ஆயுள் காப்பீட்டு பாலிசிகளையும் வாங்கிய பிறகு கடனை திரும்ப செலுத்தலாம்.

கல்விக் கடன்

அதேசமயம் வீடு, கல்விக் கடன், கண்ணுக்கு தெரிந்த மற்றும் தெரியாத சொத்துக்களை வாங்குவதற்காக பெறப்படுகிறது. இந்த கடன்களுக்கு வருமான வரியிலும் சலுகை கிடைக்கிறது. தனிநபர், கார், கிரெடிட் கார்டு கடனைக் காட்டிலும் இந்த கடன் சற்று ஆக்கப்பூர்வமானது என நிபுணர்கள் தெரிவித்துள்ளனர். எனவே வீடு, கல்விக் கடனை முன்கூட்டியே செலுத்துவதற்கு முன்னர் வரிச் சலுகை உள்ளிட்ட பல்வேறு அம்சங்களை சீர்தூக்கி பார்க்க வேண்டும் என ஆய்வாளர்கள் தெரிவித்துள்ளனர்.

கடனை முன்கூட்டியே செலுத்தும்போது உரிய முறையில் வங்கிக்கு கடிதம் கொடுத்து கடன் பாக்கி முழுவதும் தீர்க்கப்பட்டுள்ளதா என்பதை சரிபார்க்க வேண்டும்.

நன்றி: தினத்தந்தி.