கலப்பட டீ தூள் விற்ற நிறுவனத்துக்கு ரூ.25 லட்சம் அபராதம்

சென்னை,ஜூலை 09,2014
-
கலப்பட டீ தூள் விற்பனை செய்ததற்காக, தமிழ்நாடு மாநில நுகர்வோர் நல நிதிக்கு ரூ.25 லட்சம் வழங்க வேண்டும் என்று தனியார் டீ தூள் நிறுவனத்தின் உரிமையாளருக்கு மாநில நுகர்வோர் தீர்ப்பாயம் அபராதம் விதித்தது.

சென்னையில் உள்ள தமிழ்நாடு மாநில நுகர்வோர் குறைதீர்வு தீர்ப்பாயத்தில், குடிமைப்பொருள் வழங்கல் மற்றும் நுகர்வோர் பாதுகாப்பு துறை ஆணையர், இந்திய நுகர்வோர் சங்கத்தின் சார்பில் ஆர்.தேசிகன் ஆகியோர் தாக்கல் செய்துள்ள மனுக்களில் கூறியிருப்பதாவது:–
கலப்பட டீ தூள்

சென்னை பெரியமேட்டில் ஆசியா டீ கம்பெனியின் அலுவலகம் உள்ளது. இந்த கம்பெனியின் உரிமையாளராக ஏ.முகமது காசிம் என்பவர் உள்ளார். இவரது குடோன்களில் 2006–ம் ஆண்டு மார்ச் 31–ந் தேதி நடத்தப்பட்ட சோதனையில், பல்வேறு பெயர்களில் 22 விதமாக பொட்டலங்களுடன் டன் கணக்கில் டீ தூள் இருந்தது.

அவற்றை சோதனை செய்தபோது, கலப்படம் செய்யப்பட்ட டீ தூள் ஏராளமாக இருந்தது கண்டுபிடிக்கப்பட்டது. இதையடுத்து அவற்றை பறிமுதல் செய்து, அலுவலகம் மற்றும் குடோன்களுக்கு சீல் வைக்கப்பட்டது.
ரூ.11 கோடி

இதையடுத்து, நுகர்வோர் பாதுகாப்பு தென் சென்னை துணை கமிஷனர் முன்பு கடந்த 2006–ம் ஆண்டு ஏப்ரல் 3–ந் தேதி ஆசியா டீ கம்பெனி உரிமையாளர் முகமது காசிம் ஆஜராகி, டீ தூளில் கலப்படம் செய்ததை ஒப்புக்கொண்டு, எழுத்துபூர்வமாகவும் எழுதிக்கொடுத்தார்.

மேலும், இவர் மீது 1999–ம் ஆண்டு கலப்பட டீ தூள் விற்பனை செய்ததாக குடிமைப்பொருள் சி.ஐ.டி. போலீசார் கிரிமினல் வழக்கும் பதிவு செய்தனர். ஆனால், இதன்பின்னரும் இவர் கலப்பட டீ தூள் விற்பனையை செய்து வந்துள்ளார். இவர் அலுவலகத்தில் இருந்து பறிமுதல் செய்யப்பட்ட ஆவணங்கள் மூலம், இவர் 2004–05 ஆண்டுகளில் மட்டும் ரூ.11 கோடியே 26 லட்சத்து 29 ஆயிரத்து 864 டீ தூள் விற்பனை செய்துள்ளது தெரியவந்தது.
கைவிட வேண்டும்

இதையடுத்து அவருக்கு விளக்கம் கேட்டு நோட்டீசு அனுப்பினோம். ஆனால், நாங்கள் சுமத்திய குற்றச்சாட்டுகளை முகமது காசிம் மறுத்தார். ஆனால், அவருக்கு சாதகமான ஆதார ஆவணங்களும் அவர் சமர்ப்பிக்கவில்லை.

எனவே, நுகர்வோர் பாதுகாப்பு சட்டத்தின்படி, கலப்பட டீ தூள் விற்பனையை கைவிடவும், முகவர்கள் மூலம் விற்பனைக்கு அனுப்பிய கலப்பட டீ தூளை திரும்பப்பெறவும், கலப்பட டீ தூள்களை விற்பனை செய்ததற்காக ரூ.98 லட்சத்தை தமிழ்நாடு மாநில நுகர்வோர் நல நிதிக்கு வழங்கவும் முகமது காசிமுக்கு உத்தரவிடவேண்டும்.

இவ்வாறு அதில் கூறப்பட்டிருந்தது.
அரசு கோரிக்கை ஏற்பு

இந்த வழக்கு 2006–ம் ஆண்டு அப்போதைய மாநில நுகர்வோர் தீர்ப்பாயத்தின் தலைவர் கே.சம்பத் முன்பு விசாரணைக்கு வந்தது. அப்போது, எதிர்மனுதாரர் முகமது காசிம் பதில் எதுவும் அளிக்கவில்லை.

இதையடுத்து அரசு மனுவை அப்படியே ஏற்றுக்கொண்டு நீதிபதி கே.சம்பத் தீர்ப்பளித்தார். இந்த தீர்ப்பை எதிர்த்து டெல்லியில் உள்ள தேசிய நுகர்வோர் தீர்ப்பாயத்தில் முகமது காசிம் அப்பீல் செய்தார். இந்த அப்பீல் வழக்கை தமிழ்நாடு மாநில நுகர்வோர் தீர்ப்பாயம் மீண்டும் விசாரிக்க வேண்டும் என்று கூறி வழக்கை திருப்பி அனுப்பிட தேசிய நுகர்வோர் தீர்ப்பாயம் உத்தரவிட்டது.
ரூ.25 லட்சம்

இதையடுத்து இந்த வழக்கை மாநில நுகர்வோர் தீர்ப்பாயத்தின் தலைவர் நீதிபதி ஆர்.ரகுபதி, நீதித்துறை உறுப்பினர் ஜெ.ஜெயராம் ஆகியோர் விசாரித்து நேற்று பிறப்பித்த உத்தரவில் கூறியிருப்பதாவது:–

இந்த வழக்கில் அனைத்து தரப்பு வாதம், ஆதாரம் ஆவணம் ஆகியவைகளை பரிசீலித்ததில், எதிர்மனுதாரர் முகமது காசிம் கலப்பட டீ தூள் விற்பனை செய்து நியாயமற்ற தொழில் செய்துள்ளார் என்று நிரூபிக்கப்பட்டுள்ளது.

எனவே, முகமது காசிம் ரூ.25 லட்சத்தை தமிழ்நாடு மாநில நுகர்வோர் நல நிதிக்கு வழங்கவேண்டும். இந்த வழக்கை தொடர்ந்து குடிமைப்பொருள் வழங்கல் மற்றும் நுகர்வோர் பாதுகாப்பு துறை ஆணையர், இந்திய நுகர்வோர் சங்கம் ஆகியவைகளுக்கு தலா ரூ.10 ஆயிரம் வீதம் ரூ.20 ஆயிரத்தை வழக்கு செலவாக வழங்க வேண்டும்.

இவ்வாறு அதில் கூறப்பட்டுள்ளது.
-
=================
--தினத்தந்தி