தேசிய இளந்திரு விருது: தமிழகத்தை சேர்ந்த 8 பேர் தேர்வு

தமிழகத்தை சேர்ந்த எட்டு பேர் 2012ம் ஆண்டுக்கான "தேசிய இளந்திரு விருது"க்கு தேர்வு செய்யப்பட்டுள்ளனர்.

தேசிய அளவில் மேடைக்கலை, படைப்புக் கலை, அறிவியல் கலை, எழுத்துக்கலை ஆகியவற்றில் புதுமைகள் படைத்திடும் ஒன்பது வயது முதல் 16 வயதிற்குட்பட்ட குழந்தைகள் தேர்வு செய்யப்பட்டு, அவர்களுக்கு, ஜனாதிபதியால் "தேசிய இளந்திரு விருது" வழங்கப்படும். இவ்விருதுக்கான தேர்வுகள் முதலில் உள்ளூர் அளவில் நடக்கும். அதில் தேர்வு செய்யப்படுவோர் தென் மண்டல அளவில் நடக்கும் போட்டியில் பங்கேற்பர். அதில் தேர்வு செய்யப்படுவோர் தேசிய அளவில் நடக்கும் போட்டிகளில் கலந்து கொள்வர். அதில் தேர்வு செய்யப்படுபவர்களுக்கு விருது வழங்கப்படும்.

தமிழகத்தில் எட்டு பேர் 2012ம் ஆண்டுக்கான தேசிய இளந்திரு விருதுக்கு தேர்வு செய்யப்பட்டுள்ளனர். அகில இந்திய அளவில் 62 பேர் தேர்வு செய்யப்பட்டுள்ளனர். தமிழகத்திலிருந்து, சென்னையை சேர்ந்த அனந்திதா, கமலாதேவி (பரத நாட்டியம்); முத்துக்குமாரசாமி (கைவினை); தீபரக்சனா (ஓவியம்); எழுத்துக்கலையில், சென்னை அனுபமா, ஓசூர் செஷாங், கடலூர் தியாகராஜன் மனோ அரவிந்த், காஞ்சிபுரம் மாவட்டம், கிருகம்பாக்கத்தை சேர்ந்த நிகிலா ராமன் ஆகியோர் தேர்வு செய்யப்பட்டுள்ளனர்.

ஒரே ஆண்டில், தமிழகத்தை சேர்ந்த, எட்டு பேர் இவ்விருதை பெறுவது இதுவே முதன்முறை. விருதுடன் 10 ஆயிரம் ரூபாய் மதிப்புள்ள கிஷான் விகாஸ் பத்திரம், நினைவுப்பரிசு, சான்றிதழ் வழங்கப்படும். தமிழக அரசு 10 ஆயிரம் ரூபாய் நிதியுதவி வழங்கும். இதற்கான விழா விரைவில் டில்லி ஜனாதிபதி மாளிகையில் நடக்க உள்ளது. 2011ம் ஆண்டுக்கு தேர்வு செய்யப்பட்ட தமிழகத்தை சேர்ந்த மூன்று பேருக்கும் இந்த விழாவில் விருது வழங்கப்படும்.


நன்றி: தினமலர்

மகிழ்ச்சியான செய்தி