மோர்க் குழம்பு செய்யப் போகிறீர்களா?

by mohaideen Mon Aug 11, 2014 4:56 pm

மோர்க் குழம்பு செய்யப் போகிறீர்களா? வறுக்க வேண்டிய பொருட்களை வறுத்துவிட்டு, தேங்காய்க்கு பதில் பச்சையாகவே சிறிது கசகசாவைப் போட்டு அரைத்து மோர்க் குழம்பு செய்யவும். புதுச்சுவை கிடைக்கும். தேங்காய் போடாததால் கொலஸ்ட்ரால் குறையும். கசகசா போடுவதால் வயிற்றுக்குக் குளுமை! வாரத்துக்கு 3 தடவையாவது சுரைக்காய் கூட்டு செய்து சாப்பிட்டால், கொஞ்ச காலத்திலேயே தொப்பை கரையத் தொடங்கிவிடும்.

கோதுமை மாவில் உப்புச் சேர்த்து, லேசாக சுட வைத்த நீர்விட்டு, அடை மாவு பதத்துக்குக் கெட்டியாகப் பிசையவும். இத்துடன் துருவிய கேரட், பீட்ரூட், காலி ஃப்ளவர், பச்சை மிளகாய், வெங்காயம் சேர்த்து வதக்கிப் போட்டு அடை செய்யவும். கலோரி குறைவான சூப்பர் அடை தயார்! வழக்கமாக வெந்தயக் கீரையின் இலைகளை ஆய்ந்து விட்டு, தண்டுப் பகுதியை தூக்கி எறிந்து விடுவோம். அப்படிச் செய்ய வேண்டாம்.

தண்டுப் பகுதியைக் கழுவி, தண்ணீரில் வேக வைத்து வடிகட்டவும். அதில் உப்பு, மிளகு, சீரகம் தூவி சிறிது எலுமிச்சைப்பழச் சாறைக் கலந்து குடிக்கவும். ஆரோக்கியமான சூப் தயார்! குக்கரில் பருப்பு வைக்கும் போது, ஒரு டீஸ்பூன் வெந்தயத்தையும் போடவும். வெந்தயம் நன்றாக மசிந்து விடும். இதில் சாம்பார், ரசம் எது வேண்டுமானாலும் செய்யலாம். சிறிது கசப்புக்கூட இருக்காது. வெந் தயம் வாயுத் தொல்லையை விரட்டும்.

வாழைப்பூவைப் பொடியாக நறுக்கவும். அதனுடன் முருங்கைக் கீரையையும் வதக்கிச் சேர்த்து, சமைத்து சாப்பிடவும். குடற்புண் குணமாகும். நீரிழிவுக்கு நல்ல மருந்து. வேப்பம் பூக்களை உதிர விடாமல் கொத்துக் கொத்தாகப் பறித்துக் கொள்ளவும். தேவையான உப்பு, பெருங்காயம் சேர்த்து, ஜவ்வரிசி வடகக் கூழில் தோய்த்துக் காயப் போட்டு எடுத்து வைத்துக் கொள்ளவும். இந்த வடகத்தை அவ்வப்போது பொரித்து சாப்பிடலாம். ரத்த அழுத்தம், நீரிழிவு பிரச்னை உள்ளவர்களுக்கு இது ஒரு மருந்தும் கூட.

வாழைத்தண்டை நறுக்கியதும் அதை மோர் கலந்த நீரில் போட்டு விட வேண்டும். இதனால் வாழைத்தண்டின் நிறம் மாறாது. துவர்ப்பும் இருக்காது. ரசப்பொடிக்கு அரைக்கும் போது பொருட்களுடன் கொஞ்சம் வெந்தயம் சேர்த்துக் கொள்ளவும். ரசம் மணமாக இருக்கும். வயிற்றுக் கோளாறுகள் நெருங்காது. வாயுத் தொந்தரவு உள்ளவர்கள் அடை செய்யும் போது, துவரம் பருப்புக்கு பதில் கொள்ளை ஊறப் போட்டு சேர்க்கலாம்.

தக்காளி சாறு எடுக்கப் போகிறீர்களா? தக்காளியை சிறிது நீரில் கொதிக்க வைத்து, பிறகு சாறு எடுத்தால் அதில் உள்ள ‘இ’ உயிர்ச்சத்து சிறிதும் வீணாகாமல் முழுமையாகக் கிடைக்கும். கூட்டு, பொரியல், குழம்பு செய்யும் போது, சிறிது சீரகம் போட்டு தாளிக்கவும். வாசனையாக இருக்கும். சாப்பாடு எளிதாக ஜீரணம் ஆகும். முருங்கைக்காய் நீளம் உள்ள பிஞ்சு பிரண்டையை சிறியதாக நறுக்கவும். கடாயில் லேசாக எண்ணெய்விட்டு, பிரண்டையை வதக்கவும்.

பச்சை மிளகாய் 4, சிறிய துண்டு இஞ்சி, தேவையான உப்பு, கறிவேப்பிலை சேர்த்து நைசாக அரைக்கவும். எலும்புக்கு பலம் தரும் இந்த பிரண்டைத் துவையல்! பூண்டை அரைத்து, விளக்கெண்ணெயில் குழைத்து தொப்புளில் தடவி வர, வயிறு உப்புசம் மறையும். சாப்பிட்ட பிறகு, ஒரு துண்டு வெல்லத்தை வாயில் போட்டு கொஞ்சம் கொஞ்சமாக அதன் சாற்றை விழுங்கினால் அமிலச் சுரப்பால் ஏற்படும் நெஞ்சு எரிச்சல் தீரும்.

தினகரன்