விண்டோஸ் 8 வெளியீடு

உலகம் முழுவதும் 92 சதவீத கணினிகளில் பயன்படுத்தப்படுவதாக மதிப்பிடப்பட்டிருக்கும் விண்டோஸ் இயங்குதளத்தின் புதிய பதிப்பு சர்வதேசச் சந்தையில் வெள்ளிக்கிழமை அறிமுகப்படுத்தப்பட்டது. ஆப்பிளின் இயங்குதளங்கள், கூகுளின் ஆண்ட்ராய்டு இயங்குதளம் ஆகியவற்றுடன் போட்டியிடும் வகையில் விண்டோஸ் இயங்குதளம் உருவாக்கப்பட்டுள்ளது. புதிய விண்டோஸ் 8-ல், பழைய விண்டோஸ் முகப்புத் திரையையும், ஸ்டார்ட் மெனுவையும் காண முடியாது. அதற்குப் பதிலாக கட்டங்களைக் கொண்ட முற்றிலும் புதுமையான இடைமுகம் அறிமுகப்படுத்தப்பட்டிருக்கிறது.

வழக்கமாக நாம் பயன்படுத்தும் எழுத்துகள் மூலமான கடவுச் சொல்லுக்குப் பதிலாக படங்கள் மூலமான கடவுச் சொல், இந்த இயங்குதளத்தின் மற்றொரு சிறப்பம்சமாகும். விண்டோஸை தொடங்குவதற்கு சில நிமிடங்கள்வரை காத்திருக்க வேண்டியிருக்கிறது என்ற புகாருக்கும் விண்டோஸ் 8 தீர்வளித்திருக்கிறது. முந்தைய விண்டோஸ் பதிப்புகள் போல் அல்லாமல், வெறும் 8 நொடிகளில் முகப்புத் திரை வந்துவிடும். கிளவுட் ஸ்டோரேஜ் எனப்படும் இணையத்தில் இயங்கும் வசதி மூலம் டேப்லெட், ஸ்மார்ட்போன்களை ஒரே நேரத்தில் இணைக்கும் வசதியை விண்டோஸ் 8 வழங்குகிறது.

கூகுளின் பிளே ஸ்டோர், ஆப்பிளின் ஐஸ்டோர் ஆகியவற்றைப் போன்ற வின்டோஸ் ஆப் ஸ்டோர் என்ற வசதி அறிமுகப்படுத்தப்பட்டிருக்கிறது. இத்தனை வசதி கொண்ட விண்டோஸ் 8 இயங்குதளத்தை நிறுவ வேண்டுமானால், கணினியில் குறைந்தபட்சம் 1 கிகா ஹெர்ட்ஸ் திறன் கொண்ட செயலியும், ஒரு கிகாபைட் திறன் கொண்ட நினைவகமும் அவசியம். ஜூன் 2-ம் தேதிக்குப் பிறகு விண்டோஸ் 7 இயங்குதளம் கொண்ட கணினியை வாங்கியவர்கள் 699 ரூபாய் கொடுத்து விண்டோஸ் 8 இயங்குதளத்தைப் புதுப்பித்துக் கொள்ளலாம். அதற்கு முன் விண்டோஸ் 8, விண்டோஸ் எக்ஸ்பி இயங்குதளங்களை வாங்கியிருந்தால் ரூ. 1,999 கொடுத்து பதிவிறக்கம் செய்யலாம்.

மைக்ரோசாப்ட் இணையதளத்தில் விண்டோஸ் 8 இயங்குதளத்தை பதிவிறக்கம் செய்வதற்கான வசதி அளிக்கப்பட்டிருக்கிறது. வேறு எந்த இயங்குதளத்துக்கும் போட்டியாக மைக்ரோசாப்ட் இதுவரை தனது மென்பொருளை வெளியிட்டதில்லை. ஆனால், இப்போது ஆப்பிளின் ஐஓஎஸ், கூகுளின் ஆண்ட்ராய்டு, உபுண்டு போன்ற பல்வேறு இலவச இயங்குதளங்கள் பிரபலமாகியிருக்கும் வேளையில், அவற்றை எதிர்த்து சந்தையில் போட்டியிட வேண்டிய கட்டாயம் விண்டோஸ் 8-க்கு ஏற்பட்டிருக்கிறது.

பகிர்வுக்கு நன்றி அண்ணா சில தினங்களில் நான் இதை பயன்படுத்தி பார்த்து விட்டு சொல்கிறேன் அண்ணா