சீதனம் அழியாதா பெண்மை மதிக்கப்படாதா-: கவிஞர் முஹம்மத் ஸர்பான்

ஏழை வீட்டுக்கு எத்தனை தரகர்கள் வருவார்கள்.
சம்மந்தமெனும் பெயரில் எத்தனை வீட்டார்
வருவார்கள் . ஏழை வீட்டுக்கன்னி எத்தனை
தடவை அலங்காரம் செய்வது, பெண் பார்க்கும்
பெயரில் எத்தனை காமநாய்களின் முன்னால்
அவள் கூனிக்குறுகி அமர்ந்திருப்பது.

அவள் ஏழை வீட்டு கன்னி என்றாலும் ஜாடையில்
சீத்தா லட்சுமிதான், நாணத்தில் கதிஜா பிராட்டிதான்
ஏரியில் மிதக்கும் முதலை இரையை மட்டும்
கெளவும்.அந்த மாமியார் முதலை ஏழை
உடம்பிலுள்ள உதிரத்தை உறிஞ்சும் வண்ணம்
சீதனமெனும் பெயரில் கைநீட்டாமல் யாசகம் கேட்பாள்.

குளிர் வீசும் வீட்டறையும் புகழ் பரப்பும்
அணிகலன்களையும், சுய கெளரவமென்று
சொகுசு வாகனமும் கேட்கும் மாப்பிள்ளை அவ
கருவுற்று எடுக்கும் வாந்தியை கைகோர்த்து ஏந்தி பிடிப்பானா?

தினமும் நித்தம் நித்தம் நிகழும் அவமானத்தை
எண்ணி அந்த கன்னிபாவை எத்தனை இரவு
விளக்கேற்றி விழிநீர் சிந்துவது, இறைவா! நீ
சூனியக்காரன் தான் எல்லாம் நிறைந்த
செல்வனுக்கு மட்டும் பெண் பிள்ளையை வரமாய்
கொடுத்திருக்காமல், ஏழை வீட்டில் ஏன்
கருவுறச் செய்தாயே! உலகமே சொல்லுங்கள்
சீதனம் அழியாதா?பெண்மை மதிக்கப்படாதா ?

சிறப்பான கவிதை.
ஏழை வீட்டில் பிறந்து பொருளாதார நெருக்கடியில் தவிக்கும் கன்னிப் பெண்களின் உண்மை நிலையை தோலுரித்துக் காட்டியது உங்கள் கவிதை.