ஒரு புதிய அழைப்பு

வயல்களுக்குச் செல்லுங்கள்
அல்லது ஆலைகளுக்கு!
ஊர்வலங்களால், கோஷங்களால்
ஆர்ப்பாடங்களால், பிரச்சாரங்களால்
மட்டும்
எந்த நாடும் உருப்பட்டதில்லை
மேடைகளைத் தகர்த்தெறியுங்கள்
வயல்களுக்கோ ஆலைகளுக்கோ
செல்லுங்கள்!
–
உடல் மூட ஆடைகள்
வயிற்றுக்குச் சோறு
மேடைகள் நெய்வதில்லை
கோஷங்கள் விளைப்பதில்லை
நாட்டு கௌரவம் நடுத்தெருவில்!
இதுவே தருணம் பணிபுரிய
வாய் கிழியப் பேசுவதால்
புதைந்த வரலாற்றைத் தோண்டுவதால்
மட்டும்
எந்த நாடும்
உருப்பட்டதில்லை
மேடைகளைத் தகர்த்தெறியுங்கள்
வயல்களுக்கோ ஆலைகளுக்கோ
செல்லுங்கள்!
–
இந்த நாட்டின் மானம் காக்க
வியர்வைப் பெருக்கே இன்றையத் தேவை
–

தியாகம் என்றொரு தோட்டம் அமைத்தால்
மலரும் பூவின் மணமும் இணைந்தால்
வசந்தங்கள் தாமே வரும்
–
இருண்ட வீடுகளில் தீபம் ஏற்ற
நலிந்த கண்களில் ஒளியினை ஏற்ற
வீதிகளெங்கும் வெளிச்சம் பரப்ப
வாழ்க்கை நடையில் திருப்பங்கள் தேவை
–
சிந்தனைத் தோரணங்களால்
வறண்ட கருத்துரைகளால்
மட்டும்
எந்த நாடும் உருப்பட்டதில்லை
மேடைகளைத் தகர்த்தெறியுங்கள்!
வயல்களுக்கோ ஆலைகளுக்கோ
செல்லுங்கள்!
–
————————————

ஹிந்தி மூலம்: ராமாவதார் தியாகி
தமிழில்: இளம்பாரதி

சூப்பர்

வயல்களுக்கு செல்ல கூவி அழைக்கவேண்டிய நிலைமை

சமுதாய விழிப்புணர்வு தரும் கவிதைக்கு மிக்க நன்றி.