இறுதிச்சுற்றுக்கு முன்னேறுவது யார்? இங்கிலாந்து-நியூஸிலாந்து இன்று மோதல்

டி20 உலகக் கோப்பை கிரிக்கெட் போட்டியின்
முதல் அரையிறுதி ஆட்டம் தில்லியில் புதன்கிழமை
நடைபெறுகிறது. இதில் இங்கிலாந்தும், நியூஸிலாந்தும்
மோதுகின்றன.

இந்த உலகக் கோப்பையில் இதுவரை தோல்வியை
சந்திக்காத ஒரே அணியான நியூஸிலாந்து,
அரையிறுதியில் இங்கிலாந்தை வீழ்த்தி இறுதிச்சுற்றுக்கு
முன்னேறுவதில் தீவிரமாக உள்ளது. இதுவரை எந்த
உலகக் கோப்பையையும் வெல்லாத அணியான
நியூஸிலாந்து, இந்த முறை அந்த குறையைத் தீர்க்கும்
முனைப்பில் இருக்கிறது.

அதேநேரத்தில் இங்கிலாந்து அணியையும் எளிதாக
எடுத்துக்கொள்ள முடியாது. சூப்பர் 10 சுற்றில் முதல்
ஆட்டத்தில் மேற்கிந்தியத் தீவுகளிடம் தோல்வி கண்ட
இங்கிலாந்து, எஞ்சிய 3 ஆட்டங்களிலும் அபாரமாக
ஆடியுள்ளது. குறிப்பாக தென் ஆப்பிரிக்காவுக்கு எதிராக
230 ரன்கள் என்ற இலக்கை எட்டிப்பிடித்துள்ளது.

சூப்பர் 10 சுற்றில் 4 ஆட்டங்களையும் வெவ்வேறு
மைதானங்களில் ஆடியபோதும் எந்த ஆட்டத்திலும்
நியூஸிலாந்து தோற்கவில்லை என்பது அந்த அணிக்கு
கூடுதல் பலமாகும்.

பேட்டிங், பெளலிங் என இரண்டிலுமே நியூஸிலாந்து
அணி வலுவாக உள்ளது. அந்த அணியில் எந்த மாற்றமும்
இருக்காது என தெரிகிறது. மார்ட்டின் கப்டில்,
கேப்டன் கேன் வில்லியம்சன், ராஸ் டெய்லர்,
கிரான்ட் எல்லியட், கோரே ஆண்டர்சன் என வலுவான
பேட்ஸ்மேன்கள் அந்த அணியில் உள்ளனர்.

மிரட்டும் சேன்ட்னர்: வேகப்பந்து வீச்சில் ஆடம் மில்னி,
மெக்லீனாகான் ஆகியோர் பலம் சேர்க்கின்றனர். சுழற்பந்து
வீச்சில் மிட்செல் சேன்ட்னர், ஐஸ் சோதி கூட்டணி
நியூஸிலாந்தின் மிகப்பெரிய பலமாக பார்க்கப்படுகிறது.
மிட்செல் சேன்ட்னர் கடந்த 4 ஆட்டங்களில்
9 விக்கெட்டுகளை வீழ்த்தியிருக்கிறார். ஐஸ் சோதி
8 விக்கெட்டுகளை வீழ்த்தியுள்ளார். எனவே நியூஸிலாந்து
சுழற்பந்து வீச்சாளர்கள், இங்கிலாந்து பேட்ஸ்மேன்களுக்கு
மிகப்பெரிய அச்சுறுத்தலாக இருப்பார்கள் என எதிர்பார்க்கப்
படுகிறது.

ஜோ ரூட், ஜோஸ் பட்லர்: இங்கிலாந்து அணியைப்
பொறுத்தவரையில் ஜேசன் ராய், அலெக்ஸ் ஹேல்ஸ்,
ஜோ ரூட், இயோன் மோர்கன், ஜோஸ் பட்லர், மொயீன் அலி,
பென் ஸ்டோக்ஸ் என 7 முன்னணி பேட்ஸ்மேன்கள்
உள்ளனர். இவர்களில் ஜோ ரூட், ஜோஸ் பட்லர் ஆகியோர்
உச்சக்கட்ட பார்மில் இருக்கின்றனர்.

அதேநேரத்தில் இங்கிலாந்தின் பந்துவீச்சு மெச்சும்படியில்லை.
டேவிட் வில்லே, கிறிஸ் ஜோர்டான், பென் ஸ்டோக்ஸ்
ஆகியோர் ஓரளவு சிறப்பாக பந்துவீசியபோதிலும், பெரிய
அளவில் அவர்களால் தாக்கத்தை ஏற்படுத்த முடியவில்லை.

-
இதுவரை…இவ்விரு அணிகளும் இதுவரை 13 டி20
ஆட்டங்களில் மோதியுள்ளன. அதில் இங்கிலாந்து
8 வெற்றிகளையும், நியூஸிலாந்து 4 வெற்றிகளையும்
பெற்றுள்ளன. ஓர் ஆட்டத்தில் முடிவு எட்டப்படவில்லை.
உலகக் கோப்பையில் இவ்விரு அணிகளும் 4 முறை மோதி,
தலா 2 வெற்றிகளைப் பெற்றுள்ளன. டி20 உலகக் கோப்பையில்
2010-இல் இங்கிலாந்து சாம்பியன் பட்டம் வென்றுள்ளது.

அதேநேரத்தில் நியூஸிலாந்து அணி 2007-ல் அரையிறுதி
வரை முன்னேறியது. அதில் பாகிஸ்தானிடம் தோற்றது.
-.
போட்டி நேரம்: இரவு 7
நேரடி ஒளிபரப்பு:
ஸ்டார் ஸ்போர்ட்ஸ்
–
————————————
தினமணி