அமெரிக்க நாடாளுமன்றத்தில் ஜூன் 8 -இல் மோடி உரை

by rammalar Fri Apr 29, 2016 9:22 am

அமெரிக்க நாடாளுமன்றத்தின் கூட்டுக் கூட்டத்தில்,
வரும் ஜூன் 8-ஆம் தேதி உரையாற்ற,
பிரதமர் நரேந்திர மோடிக்கு அந்நாட்டு நாடாளுமன்ற
பிரதிநிதிகள் சபையின் தலைவர் பால் ரேயான் அழைப்பு
விடுத்துள்ளார்.

இதுதொடர்பாக அவர், வாஷிங்டனில் செய்தியாளர்களிடம்
வியாழக்கிழமை மேலும் கூறியதாவது:

உலகின் மிகப் பெரிய ஜனநாயக நாடாக விளங்கும்
இந்தியாவின் பிரதமராக உள்ள நரேந்திர மோடி,
அமெரிக்க நாடாளுமன்றத்தில் உரையாற்றுவதைக்
கேட்பதை நாங்கள் சிறந்த வாய்ப்பாக கருதுகிறோம்.

இரு நாடுகளின் வளர்ச்சி குறித்தும், பல்வேறு
துறைகளில் இந்தியாவுக்கும், அமெரிக்காவுக்கும்
இடையேயான ஒத்துழைப்பு பற்றியும்
நரேந்திர மோடி, அமெரிக்க நாடாளுமன்றத்தில்
சிறப்புரையாற்றுவதை கேட்க நாங்கள் ஆவலாக
உள்ளோம்.

இரு நாடுகளுக்கும் இடையேயான நட்புறவு, உலக அளவில்
முக்கியத்துவம் வாய்ந்ததாகும் என்று பால் ரேயான்
தெரிவித்தார்.

அமெரிக்காவின் இந்த அழைப்பையடுத்து, அந்நாட்டு
நாடாளுமன்றத்தின் கூட்டுக் கூட்டத்தில்
உரையாற்றவுள்ள 5-ஆவது இந்தியப் பிரதமர் என்ற
பெருமையை நரேந்திர மோடி பெறவுள்ளார்.

இதற்கு முன்னர், ராஜீவ் காந்தி, நரசிம்ம ராவ், வாஜ்பாய்,
மன்மோகன் சிங் ஆகியோர், அமெரிக்க நாடாளுமன்றத்தில்
உரையாற்றியுள்ளனர் என்பது குறிப்பிடத்தக்கது.

வரவேற்பு: அமெரிக்க நாடாளுமன்றத்தில் உரையாற்ற,
பிரதமர் நரேந்திர மோடிக்கு அழைப்பு விடுத்துள்ளதற்காக
பால் ரேயானுக்கு, அமெரிக்க நாடாளுமன்ற உறுப்பினர்கள்
பலர் பாராட்டு தெரிவித்துள்ளனர்.

வெளியுறவு விவகாரங்களுக்கான அமெரிக்க
நாடாளுமன்றக் குழுவின் தலைவர் எட் ராய்சி கூறியபோது,
"அமெரிக்க நாடாளுமன்றத்தில் மோடி உரையாற்றவுள்ளது,
இரு நாடுகளுக்கு இடையேயான ஆழமான நட்புறவின்
முக்கிய அடையாளமாகும்' என்றார்.
-
-----------------------------------
தினமணி