தெலங்கானா: கோடை வெயிலுக்கு இதுவரை 137 பேர் பலி

by rammalar Fri Apr 29, 2016 9:24 am

தெலங்கானா மாநிலத்தில் கோடை வெயிலின்
கொடுமைக்கு இதுவரை 137 பேர் உயிரிழந்தனர்.

இதுதொடர்பாக, மாநில பேரிடர் மேலாண்மைத்
துறை அதிகாரி ஒருவர், வியாழக்கிழமை கூறியதாவது:

தெலங்கானாவில் வெயிலின் கொடுமைக்கு மேலும்
15 பேர் உயிரிழந்தனர். இதனால், இறந்தவர்களின்
எண்ணிக்கை 137-ஆக அதிகரித்துள்ளது. இதில்,
அதிகபட்சமாக மேடக் மாவட்டத்தில் மட்டும் 34 பேர்
இதுவரை உயிரிழந்துள்ளனர்.

இதுதவிர, மெஹபூப்நகரில் 30 பேரும், நல்கொண்டாவில்
26 பேரும், ரங்காரெட்டியில் 10 பேரும், கம்மமில்
7 பேரும், கரீம்நகரில் 13 பேரும், அடிலாபாதில் 9 பேரும்,
நிஜாமாபாதில் 8 பேரும் இதுவரை உயிரிழந்தனர் என்று
அந்த அதிகாரி தெரிவித்தார்.

இந்நிலையில் மாநிலத்தில் நிலவும் வறட்சி நிலைமை
குறித்து, மாவட்ட ஆட்சியர்களுடன் முதல்வர்
சந்திரசேகர ராவ் வெள்ளிக்கிழமை ஆலோசனை
நடத்தவுள்ளார்.

இதனிடையே, மாநிலத்தின் பெரும்பாலான பகுதிகளில்
வியாழக்கிழமை வெப்பநிலை சற்று குறைந்து காணப்
பட்டதாக ஹைதராபாதில் உள்ள இந்திய வானிலை
ஆய்வு மையத்தின் இயக்குநர் ஒய்.கே.ரெட்டி கூறினார்.

இதே நிலைமை வெள்ளிக்கிழமையும் தொடரும் என்றும்,
எனினும் காற்றின் தன்மை மாறினால் வெப்பநிலை
மேலும் அதிகரிக்கும் என்றும் அவர் கூறினார்.
-
---------------------------
தினமணி