நாளை விண்ணில் பாய்கிறது இந்தியாவின் முதல் ஆர்.எல்.வி டிடி ராக்கெட்

முழுவதும் இந்தியத் தொழில்நுட்பத்தில் தயாரான
முதல் ஆர்.எல்.வி டிடி ராக்கெட் நாளை திங்கள்கிழமை விண்ணில்
ஏவப்படுகிறது.

இந்தியாவின் முதல் மறுபயன்பாட்டு ராக்கெட்டான ஆர்.எல்.வி டிடி
நாளை விண்ணில் செலுத்த அனைத்து ஏற்பாடுகளும் தயார்
நிலையில் இருப்பதாக இஸ்ரோ தலைவர் கிரண்குமார் கூறியுள்ளார்.

பொதுவாக, விண்ணில் செலுத்தப்படும் ராக்கெட்டுகள் செயற்கைக்
கோள்களை விண்ணில் நிலைநிறுத்திய பிறகு வெடித்துச் சிதறி
கடலில் விழுந்து வீணாகி விடுவது வழக்கம். பலகோடி ரூபாய் செலவில்
உருவாக்கப்படும் ராக்கெட்டுக்கள் இவ்வாறு வீணாவதை தவிர்க்க
அமெரிக்க விண்வெளி ஆய்வு மையமான நாசா மறு பயன்பாட்டுக்கு
கொண்டு வரக்கூடிய ராக்கெட்டுக்களை பயன்படுத்துகிறது.

பால்கன் 9 உள்ளிட்ட நாசாவின் ராக்கெட்டுக்கள் பத்திரமாக பூமிக்கு
திரும்பி வரக் கூடியவை.

இந்நிலையில் இதே போன்று மறுபயன்பாட்டிற்கு ராக்கெட்டுக்களை
கொண்டு வரும் சோதனையில் இந்திய விண்வெளி ஆராய்ச்சி
நிறுவனமான இஸ்ரோ இறங்கியுள்ளது.

இது இந்திய விண்வெளி ஆய்வு வரலாற்றில் முக்கிய மைல்கல்லாகும்.
இந்திய விண்வெளி ஆய்வு மையம் (இஸ்ரோ) விஞ்ஞானிகளின்
உழைப்புக்குக் கிடைத்த மிகப்பெரிய வெற்றியாக இது கருதப்படுகிறது.

இதற்காக ஆர்.எல்.வி டிடி என்கிற ராக்கெட்டை தயாரித்துள்ள இஸ்ரோ,
நாளை காலை 9.30 மணிக்கு அந்த ராக்கெட்டை ஆந்திர மாநிலம்
ஸ்ரீஹரிகோட்டாவில் உள்ள சதீஸ் தவாண் ஏவுதளத்தில் இருந்து விண்ணில்
செலுத்துகிறது.

இதற்காக ஸ்ரீஹரிகோட்டா செல்ல பெங்களூருவிலிருந்து சென்னை வந்த
இஸ்ரோ தலைவர் கிரண்குமார் விமான நிலையத்தில் செய்தியாளர்களைச்
சந்தித்தார். அப்போது ஆர்.எல்.வி டிடி ராக்கெட்டை நாளை பரிசோதனை
செய்வதற்கான அனைத்து ஏற்பாடுகளும் தயார் நிலையில் இருப்பதாக
கூறினார்.

இந்த ஆர்.எல்.வி டிடி ராக்கெட் இப்போது முதல்முறையாக தொழில்
நுட்பரீதியாக சோதனை முறையில் ஏவப்படுகிறது. இது வெற்றிகரமாக
பரிசோதிக்கப்பட்ட பிறகு செயற்கைக்கோள்களுடன் செலுத்தப்படும்
என்று இஸ்ரோ விஞ்ஞானிகள் தெரிவித்தனர்.
–
————————–
தினமணி