ஐ.பி.எல். வெளியேற்றுதல் சுற்றில் ஐதராபாத்-கொல்கத்தா இன்று மோதல்

புதுடெல்லி,

ஐ.பி.எல். கிரிக்கெட்டில் வெளியேற்றுதல் சுற்றில்
ஐதராபாத்-கொல்கத்தா அணிகள் இன்று
(புதன்கிழமை) பலப்பரீட்சை நடத்துகின்றன.

கொல்கத்தா உற்சாகம்

9-வது ஐ.பி.எல். கிரிக்கெட் தொடரில் லீக் சுற்று
முடிவில் புள்ளி பட்டியலில் 3-வது இடத்தை பிடித்த
ஐதராபாத் சன்ரைசர்சும், 4-வது இடம் பெற்ற
கொல்கத்தா நைட் ரைடர்சும் இன்றிரவு
வெளியேற்றுதல் சுற்றில் (எலிமினேட்டர்)
மோதுகின்றன.

டெல்லி பெரோஸ்ஷா கோட்லா மைதானத்தில்
நடைபெறும் இந்த ஆட்டத்தில் வெற்றி பெறும்
அணி இறுதிப்போட்டிக்கான 2-வது தகுதி சுற்றில்
விளையாடும். தோற்கும் அணி நடையை கட்டும்.

இரண்டு முறை சாம்பியனான கொல்கத்தா அணிக்கே
இந்த ஆட்டத்தில் வெற்றி வாய்ப்பு சற்று அதிகம்
இருப்பதாக கணிக்கப்பட்டுள்ளது. ஏனெனில் இவ்விரு
அணிகளும் லீக்கில் சந்தித்த இரண்டு ஆட்டங்களிலும்
கொல்கத்தா அணி 8 விக்கெட் மற்றும் 22 ரன்கள்
வித்தியாசத்தில் ஐதராபாத்தை புரட்டியெடுத்தது.

கேப்டன் கவுதம் கம்பீர் (473 ரன்), ராபின் உத்தப்பா
(383 ரன்), யூசுப் பதான் (359 ரன்), மனிஷ் பாண்டே (212 ரன்)
ஆகியோர் கொல்கத்தா அணிக்கு பேட்டிங்கில் வலு
சேர்க்கிறார்கள்.
ஆல்-ரவுண்டர் ஆந்த்ரே ரஸ்செல் இந்த ஆட்டத்திலும்
விளையாடுவது சந்தேகம் தான்.

-
மிரட்டுமா சுழல்

சுனில் நரின், பியுஷ் சாவ்லா, ஷகிப் அல்-ஹசன்,
குல்தீப் யாதவ் ஆகிய சுழற்பந்து வீச்சாளர்கள்
கொல்கத்தாவின் வெற்றியில் கணிசமான பங்களிப்பை
அளித்து இருக்கிறார்கள். டெல்லி ஆடுகளம் வேகம்
குறைந்தது என்பதால் சுழற்பந்து வீச்சாளர்களின் தாக்கம்
முக்கிய பங்கு வகிக்கலாம்.

எப்படியும் மூன்று சுழற்பந்து வீச்சாளர்கள் ஆடும் லெவன்
அணியில் இடம் பெறுவார்கள் என்பதால் இவர்கள் தான்
ஐதராபாத் பேட்ஸ்மேன்களுக்கு அச்சுறுத்தலாக இருப்பார்கள்.

ஐதராபாத் அணிக்கு, கேப்டன் டேவிட் வார்னர் தான்
ஆணிவேராக இருக்கிறார். இதுவரை 7 அரைசதம் உள்பட
658 ரன்கள் குவித்திருக்கும் அவர் 10 ஓவர்களுக்கு மேல்
நிலைத்து விட்டாலே ஐதராபாத் அணிக்கு சாதகமான சூழல்
உருவாக தொடங்கி விடும்.
ஷிகர் தவான் (4 அரைசதத்துடன் 463 ரன்), யுவராஜ்சிங்,
வில்லியம்சன், ஹென்ரிக்ஸ், தீபக் ஹூடா ஆகியோரும்
நன்றாக ஆடினால், நிச்சயம் ஐதராபாத் நல்ல நிலையை
எட்ட முடியும்.

கொல்கத்தா அணிக்கு சுழல் என்றால், ஐதராபாத் அணியில்
வேகம் தான் பலம். முஸ்தாபிஜூர் ரகுமான் (16 விக்கெட்),
புவனேஸ்வர்குமார் (18 விக்கெட்), பரிந்தர் ஸ்ரன் (12 விக்கெட்)
உள்ளிட்டோர் வலு சேர்க்கிறார்கள். முந்தைய தோல்விகளுக்கு
பழிதீர்க்கும் உத்வேகத்துடன் ஐதராபாத் வீரர்கள் வரிந்து
கட்டுவதால் ஆட்டத்தில் சூடுபறக்கும் என்று நம்பலாம்.

வீரர்கள் விவரம்

இரு அணிகளின் உத்தேச பட்டியல் வருமாறு:-

கொல்கத்தா:
உத்தப்பா,
கம்பீர் (கேப்டன்),
காலின் முன்ரோ அல்லது ரஸ்செல்,
மனிஷ் பாண்டே,
யூசுப் பதான்,
ஷகிப் அல்-ஹசன்,
சூர்யகுமார் யாதவ்,
அங்கித் ராஜ்புத்,
சுனில் நரின்,
குல்தீப் யாதவ் அல்லது பியுஷ் சாவ்லா,
ஜாசன் ஹோல்டர் அல்லது மோர்னே மோர்கல்.

ஐதராபாத்:
ஷிகர் தவான்,
டேவிட் வார்னர் (கேப்டன்),
நமன் ஓஜா,
யுவராஜ்சிங்,
வில்லியம்சன் அல்லது மோர்கன்,
தீபக் ஹூடா,
ஹென்ரிக்ஸ்,
கரண் ஷர்மா அல்லது பிபுல் ஷர்மா,
புவனேஸ்வர்குமார்,
பரிந்தர் ஸ்ரன்,
முஸ்தாபிஜூர் ரகுமான்.

இரவு 8 மணிக்கு தொடங்கும் இந்த ஆட்டத்தை சோனி சிக்ஸ்,
சோனி செட்மேக்ஸ் சேனல்கள் நேரடி ஒளிபரப்பு செய்கின்றன.
-
-------------------------------------
தினத்தந்தி