1,500 பெண்களுக்கு ஆபாச எஸ்எம்எஸ்: இளைஞர் கைது

by rammalar Fri Jul 08, 2016 9:48 am

தில்லியில் 1,500-க்கும் மேற்பட்ட பெண்களுக்கு ஆபாச விடியோ காட்சிகள், குறுந்தகவல்களை செல்லிடப்பேசியில் அனுப்பி தொந்தரவு கொடுத்து வந்த இளைஞரை போலீஸார் கைது செய்தனர்.

இது குறித்து தில்லி வடமேற்கு மாவட்ட காவல்துறை துணை ஆணையர் விஜய் சிங் செய்தியாளர்களிடம் புதன்கிழமை கூறியதாவது: தில்லி வட மேற்கு மாவட்டம், அசோக் விஹார் காவல் சரகப் பகுதியைச் சேர்ந்த பெண் கடந்த மே 30ஆம் தேதி போலீஸில் புகார் அளித்தார். அதில், தனது செல்லிடப்பேசிக்கு ஒருவர் ஆபாச குறுந்தகவல்களையும், கட்செவி அஞ்சலில் ஆபாச விடியோ காட்சிகளையும் தொடர்ந்து அனுப்பி வருவதாகத் தெரிவித்திருந்தார். இதுகுறித்து போலீஸார் வழக்குப் பதிந்து விசாரணை நடத்தினர். அப்போது, சம்பந்தப்பட்ட மர்ம நபர் பயன்படுத்தும் செல்லிடப்பேசி எண்ணுக்குரிய "சிம் கார்டு' போலி ஆவணங்கள் மூலம் பெறப்பட்டிருந்தது தெரிய வந்தது.

மேலும், அந்த மர்ம நபர் மேலும் சில சிம் கார்டுகளை போலி ஆவணங்கள், அடையாள அட்டைகள் மூலம் பெற்றிருந்ததும் விசாரணையில் தெரியவந்தது. இதையடுத்து, தொழில்நுட்ப கண்காணிப்பு சாதனங்கள் உதவியுடன் சம்பந்தப்பட்ட நபர் குறித்து போலீஸார் விசாரணை நடத்தினர். அப்போது, பல்லிமாரானைச் சேர்ந்தவரும், சதர் பஜாரில் பை வியாபாரத்தில் ஈடுபட்டு வருபவருமான முகம்மது காலித் (31) இந்த விவகாரத்தில் சம்பந்தப்பட்டிருப்பது தெரிய வந்தது. இதையடுத்து, அவரிடம் தீவிர விசாரணை நடத்தப்பட்டது. அதில், அவர்தான் இந்த ஆபாச குறுந்தகவல்களை அனுப்பியிருந்தது தெரிய வந்தது.

அவரைக் கைது செய்து இரு நாள் காவலில் எடுத்து விசாரணை மேற்கொள்ளப்பட்டது. அப்போது, தில்லி, தேசியத் தலைநகர் வலயப் பகுதிகளில் 1500-க்கும் மேற்பட்ட பெண்களுக்கு இதுபோன்று ஆபாச குறுந்தகவல்கள், விடியோ காட்சிகளை செல்லிடப்பேசி வழியாக அனுப்பி அவர் தொந்தரவு கொடுத்து வந்திருப்பது தெரிய வந்தது. அவரிடமிருந்து ஆபாச எஸ்எம்எஸ் அடங்கிய செல்லிடப்பேசி பறிமுதல் செய்யப்பட்டது என்றார் விஜய் சிங்.