பாலியல் தொல்லையால் பாதிக்கப்படும் பெண் ஊழியர்களுக்கு 90 நாள் விடுப்பு

மத்திய அரசில் பணிபுரியும் பெண் ஊழியர்கள் பாலியல் தொல்லையால் பாதிக்கப்பட்டால் 90 நாள்களுக்கு ஊதியத்துடன் கூடிய விடுப்பு அளிக்கப்படும் என்று அறிவிக்கப்பட்டுள்ளது.

தாங்கள் அளிக்கும் புகார் மனு தொடர்பான விசாரணை நடவடிக்கைகளை பாதிக்கப்பட்ட ஊழியர்கள் மேற்கொள்வதற்காக இச்சலுகை வழங்கப்படவுள்ளது.

இதுகுறித்து மத்திய பணியாளர் நலத்துறை பிறப்பித்துள்ள ஆணையில், “பாலியல் தொல்லையால் பாதிக்கப்படும் பெண் ஊழியர்களுக்கு விசாரணைக் காலத்தின்போது அதிகபட்சமாக 90 நாள்கள் வரை விடுப்பு வழங்கப்படும்.

புதிய விதிமுறையின்படி வழங்கப்படும் விடுப்பு நாள்களுக்கு ஈடாக ஊழியர்களுக்கான விடுப்பு நாள் எண்ணிக்கை குறைக்கப்படாது’ என்று தெரிவிக்கப்பட்டுள்ளது.

இதுதொடர்பாக பணியாளர் நலத் துறையின் மூத்த அதிகாரி ஒருவர் கூறுகையில், “பாதிக்கப்படும் பெண் ஊழியர்களுக்கு விடுப்பு வழங்குவதன் மூலம், குற்றம்சாட்டப்பட்டுள்ள நபருடன் சேர்ந்து பணிபுரிய வேண்டிய நெருக்கடி ஏற்படாது’ என்றார்.

பாலியல் தொல்லை: உடல் ரீதியாக நெருங்குவது, பாலியல் தேவைகளுக்கு இணங்கும்படி கோரிக்கை வைப்பது, வாய்மொழி வாயிலாகவோ அல்லது சைகை ரீதியாகவோ பாலியல் ஆசைகளை வெளிப்படுத்துவது, ஆபாசப் படங்களை காண்பிப்பது போன்ற நடவடிக்கைகளை பாலியல் தொல்லைகளாக மத்திய அரசு வரையறை செய்துள்ளது. பாதிக்கப்பட்ட பெண்களிடம் குற்றம்சாட்டப்படும் நபர் பணி ரீதியாக பாகுபாடு காட்டுவது, வேலை நிலை குறித்து மிரட்டல் விடுப்பது, வேலைகளில் குறுக்கிடுவது போன்ற நடவடிக்கைகளை தவிர்ப்பதற்காக விசாரணைக் காலத்தின்போது விடுப்பு வழங்கப்படும் என் அறிவிக்கப்பட்டுள்ளது.

தினமணி