உள்நாட்டிலேயே தயாரிக்கப்பட்ட 3 பீரங்கிகள் ராணுவத்திடம் ஒப்படைப்பு

உள்நாட்டிலேயே முழுவதுமாக தயாரிக்கப்பட்ட
3 “தனுஷ்’ பீரங்கிகள் இந்திய ராணுவத்திடம் ஞாயிற்றுக்
கிழமை ஒப்படைக்கப்பட்டன.

மத்தியப் பிரதேச மாநிலம், ஜபல்பூரில் உள்ள பீரங்கிகள்
தயாரிப்புத் தொழிற்சாலையில் இந்த “தனுஷ்’ பீரங்கிகள்
தயாரிக்கப்பட்டன.

இதுகுறித்து அந்தத் தொழிற்சாலையின் இணைப் பொது
மேலாளரும், மக்கள் தொடர்பு அதிகாரியுமான சஞ்சய்
ஸ்ரீவாஸ்தவா, பிடிஐ செய்தியாளரிடம் ஞாயிற்றுக்கிழமை
கூறியதாவது:

இந்திய ராணுவம் 6 பீரங்கிகளை தயாரித்துத் தருமாறு
கோரியிருந்தது. அதன்படி, முதல்கட்டமாக “தனுஷ்’ என்ற
பெயரில் 3 பீரங்கிகள் தயாரிக்கப்பட்டு அண்மையில்
ராணுவத்திடம் முன்னோட்டப் பயன்பாட்டுக்காக
ஒப்படைக்கப்பட்டது.

மேலும், 3 பீரங்கிகள் தயாரிக்கப்பட்டுவிட்டன. அவை
விரைவில் ராணுவத்திடம் ஒப்படைக்கப்படும் என்றார்
சஞ்சய் ஸ்ரீவாஸ்தவா.

மற்றொரு அதிகாரி ஒருவர் கூறுகையில், “30 கி.மீ.
தொலைவு வரை தாக்கும் வல்லமை கொண்ட “தனுஷ்’ வகை
பீரங்கியை கொல்கத்தாவில் உள்ள பீரங்கி தொழிற்சாலை
வடிவமைத்தது.

கடந்த 1980-ஆம் ஆண்டில் மேற்கொள்ளப்பட்ட போபர்ஸ்
பீரங்கி ஒப்பந்தத்தின்படி பெறப்பட்ட 12,000 பக்கங்கள்
கொண்ட பீரங்கி தயாரிப்பு தொழில்நுட்பத்தை படித்த பிறகு,
தனுஷ் பீரங்கி வடிவமைக்கப்பட்டது’ என்றார்.
–
——————————
தினமணி

மகிழ்ச்சி