செப்.17-ஆம் தேதியை ஹைதராபாத் விடுதலை நாளாகக் கொண்டாட வேண்டும்

தெலங்கானா அரசு, வரும் 17-ஆம் தேதியை ஹைதராபாத்
விடுதலை நாளாகக் கொண்டாட வேண்டும் என்று மத்திய
அமைச்சரும், பாஜக மூத்த தலைவருமானபண்டாரு தத்தாத்ரேயா
வலியுறுத்தியுள்ளார்.

ஹைதராபாதில் திங்கள்கிழமை செய்தியாளர்களைச் சந்தித்த
அவர், ""செப்டம்பர் 17-ஆம் தேதியை, ஹைதராபாத் விடுதலை
நாளாக தெலங்கானா அரசு கொண்டாட வேண்டும் என்பதே
பாஜகவின் நிலைப்பாடு'' என்றார்.

எனினும், அவரது கருத்தை ஆளும் தெலங்கானா ராஷ்டிர சமிதி
(டிஆர்எஸ்) கட்சி ஏற்கவில்லை. இதுதொடர்பாக, தெலங்கானா
கூட்டு நடவடிக்கைக் குழுவின் தலைவர் எம்.கோதண்டராம்
கூறியதாவது:

ஹைதராபாதின் வரலாற்றில் செப்டம்பர் 17-ஆம் தேதி முக்கியமான
நாளாகும். 1948-ஆம் ஆண்டு செப்டம்பர் 17-ஆம் தேதி, நிஜாமின்
ஆட்சி வரம்பில் இருந்த ஹைதராபாத் நகரம், ஒருங்கிணைந்த
இந்தியாவின் ஒரு பகுதியாக இணைந்தது.

அந்த நாளில், ஹைதராபாத் விடுதலை அடைந்துவிட்டதாக சிலர்
கூறினர். ஆனால், அதன் பிறகுதான் இன்னல்களை அனுபவித்தாக
வேறு சிலர் கூறத் தொடங்கினர். தனித் தெலங்கானா மாநிலப்
போராட்டம் வலுப்பெற்றதை அடுத்து, செப்டம்பர் 17-ஆம் தேதியை
ஒருமைப்பாட்டு தினமாகக் கொண்டாட ஒருமனதாக முடிவு செய்யப்
பட்டது.

எனவே, வரும் 17-ஆம் தேதி தேசிய ஒருமைப்பாட்டு தினமாகவே
கொண்டாடப்பட வேண்டும்.

இல்லாவிட்டால், இந்த விவகாரம் குறித்து விவாதிக்க அனைத்துக்
கட்சிக் கூட்டத்துக்கு தெலங்கானா அரசு ஏற்பாடு செய்ய வேண்டும்
என்றார் அவர்.

இதனிடையே, வாரங்கல் மாவட்டத்தில் வரும் 17-ஆம் தேதி நடைபெறும்
"ஹைதராபாத் விடுதலை நாள்' கொண்டாட்டத்தில் பாஜக தேசியத்
தலைவர் அமித் ஷா கலந்துகொண்டு உரையாற்றவுள்ளார்.
-
------------------------------------
தினமணி