நீதிமன்ற அனுமதி தேவையில்லை பெண் கைதிகள் விரும்பினால் கருக்கலைப்பு செய்துகொள்ளலாம் மும்பை ஐகோர்ட்டு த

மும்பை

பெண் கைதிகள் விரும்பினால் கருக்கலைப்பு செய்து
கொள்ளலாம், இதற்கு நீதிமன்ற அனுமதி தேவையில்லை
என மும்பை ஐகோர்ட்டு தீர்ப்பு கூறியுள்ளது.

பெண் கைதி கோரிக்கை
-
மும்பை பைகுல்லாவில் உள்ள பெண்கள் சிறையில்
பெண் நீதிபதி ஒருவர், கடந்த சில மாதங்களுக்கு முன்
ஆய்வு நடத்தினார். அப்போது 5 மாத கர்ப்பிணி கைதி ஒருவர்
தான் கருக்கலைப்பு செய்து கொள்ள விரும்புவதாகவும்,
அதற்கு அனுமதி அளிக்கவேண்டும் என கூறியிருந்தார்.

சட்டப்படி, கருத்தரித்த 12 வாரங்களுக்குள் பெண்கள்
கருகலைப்பு செய்து கொள்ளலாம். 2 டாக்டர்கள் ஒப்புதல்
அளித்தால் 20 வாரங்களுக்குள் கருக்கலைப்பு மேற்கொள்ள
சட்டம் அனுமதிக்கிறது.

ஆனால் நீதிபதியிடம் கருக்கலைப்பிற்கு விண்ணப்பித்த
பெண் 5 மாத கர்ப்பமாக இருந்ததால் அவருக்கு கருக்கலைப்பு
செய்வதில் சிக்கல் ஏற்பட்டது.

இந்தநிலையில் இந்த சம்பவம் குறித்த பெண் நீதிபதியின்
அறிக்கையை மும்பை ஐகோர்ட்டு பொதுநலன் மனுவாக
விசாரணைக்கு எடுத்து கொண்டது.

கருக்கலைப்பு செய்யலாம்
-
மனுவை விசாரித்த நீதிபதிகள் தகில்ரமணி மற்றும் மிருதுலா
ஆகியோர் தங்கள் தீர்ப்பில் கூறியுள்ளதாவது:–

சாதாரண பெண்களை போலவே சிறையில் இருக்கும் பெண்
கைதிகளுக்கும் கருகலைப்பு செய்து கொள்ளும் உரிமை உள்ளது.
எனவே பெண் கைதிகள் விரும்பினால் கருக்கலைப்பு செய்து
கொள்ளலாம். இதற்காக எங்களிடம் அனுமதி கேட்கவேண்டிய
தேவையில்லை என கூறியுள்ளனர்.

ஜெயில் நிர்வாகத்திற்கு உத்தரவு
-
மேலும் நீதிபதிகள் ‘ஜெயிலுக்குள் ஒரு பெண் கைதி
அடைக்கப்பட்ட 5 நாட்களுக்குள் கருத்தரிப்பு சோதனை
செய்யவேண்டும். பின்னர் 30 நாட்களுக்குள் 2–வது பரிசோதனை
செய்யவேண்டும். இதில், அந்த கைதி கர்ப்பமாக இருப்பது
தெரியவந்தால் அவரின் விருப்பதின்பேரில் ஜெயில் நிர்வாகம்
கருக்கலைப்பு செய்ய அனுமதி வழங்கவேண்டும்.

மேலும் கருக்கலைப்பு செய்யும் பெண் கைதிக்கு உரிய மருத்துவ
சேவைகள் கிடைப்பதையும் உறுதி செய்யவேண்டும்’ என
பெண் கைதிகள் அடைக்கப்படும் ஜெயில் நிர்வாகத்திற்கு
உத்தரவிட்டுள்ளனர்.
-
-------------------------------------
தினத்தந்தி