ரயிலில் தங்க நகை கடத்தப்படுவதாக ரகசியத் தகவல்: ஐ.ஜி. சென்ற பெட்டியில் சோதனையிட்ட சிபிஐ

ரயிலில் பல கோடி மதிப்புள்ள தங்கநகை, பணம்
கடத்தப்படுவதாக ரகசிய தகவல் கிடைத்ததால்,
ரயில்வே பாதுகாப்புப் படை (ஆர்.பி.எஃப்) ஐ.ஜி. சென்ற
பெட்டியில் சிபிஐ அதிகாரிகள் சோதனை செய்தனர்.

இது குறித்து சிபிஐ தரப்பில் கூறப்பட்டதாவது:

திருச்சியில் இருந்து ஹெளராவுக்கு செவ்வாய்க்கிழமை
புறப்பட்டுச் சென்ற விரைவு ரயிலில் பல கோடி மதிப்புள்ள
தங்க நகையும், பணமும் கடத்தப்படுவதாக சென்னை
சிபிஐ அதிகாரிகளுக்கு ரகசியத் தகவல் வந்தது.

அந்தத் தகவலின் அடிப்படையில் சென்னை எழும்பூர் ரயில்
நிலையத்துக்கு செவ்வாய்க்கிழமை இரவு 10 மணியளவில்
வந்த அந்த ரயிலில் சோதனை நடத்த சிபிஐ அதிகாரிகள்
வந்தனர்.

இதில் அந்த ரயிலில், சென்னை ஐ.சி.எஃப். ரயில்வே பாதுகாப்புப்
படை ஐ.ஜி. எஸ்.கே. பாரி செல்வதற்காக பொருத்தப்பட்டிருந்த
தனி பெட்டியிலேயே தங்கநகை, பணம் கடத்தப்படுவதாக
தகவல் கிடைத்ததால், அந்தப் பெட்டியில் ஏறி சிபிஐ அதிகாரிகள்
சோதனை செய்தனர்.

மேலும் ஐ.ஜி. பாரியிடமும் இது தொடர்பாக சிபிஐ அதிகாரிகள்
விசாரணை மேற்கொண்டனர். அதேவேளையில்
செவ்வாய்க்கிழமை இரவு 10 மணிக்கு தொடங்கி புதன்கிழமை
அதிகாலை 4 மணி வரை இந்தச் சோதனை நடைபெற்றது.

இந்தச் சோதனையில் எந்தப் பொருளும் கிடைக்கவில்லை
என சிபிஐ அதிகாரிகள் தெரிவித்தனர்.

இந்தச் சோதனை காரணமாக, எழும்பூர் ரயில் நிலையத்தில்
செவ்வாய்க்கிழமை இரவு பரபரப்பு ஏற்பட்டது.
இந்தச் சோதனையில் பொருள்கள் எதுவும் கிடைக்காதது
சிபிஐ அதிகாரிகளை அதிர்ச்சி அடைய செய்தது.
-
------------------------------------------
தினமணி