கருப்புப் பணத்தை மாற்றித் தருவதாகக் கூறி ரூ. 34 லட்சம் மோசடி: 5 பேர் மீது வழக்குப் பதிவு

by rammalar Wed Nov 30, 2016 9:13 am

அரியலூரில் கருப்புப் பணத்தை மாற்றித் தருவதாகக் கூறி
ரூ. 34 லட்சத்தை மோசடி செய்ததாக 5 பேர் மீது போலீஸார்
வழக்குப் பதிந்தனர்.

கருப்புப் பணத்தை ஒழிக்கும் முயற்சியாக,
ரூ. 500, 1,000 நோட்டுகள் செல்லாது என பிரதமர் மோடி கடந்த
8-ஆம் தேதி இரவு அறிவித்தார். இதையடுத்து பொதுமக்கள்
தங்களது பழைய ரூ. 500, 1,000 நோட்டுகளை வங்கியில்
கொடுத்து புதிய பணத் தாள்களை பெற்று வருகின்றனர்.

இதற்கிடையே ஆங்காங்கே கருப்புப் பணத்தை, வெள்ளையாக்கும்
முயற்சிகளும் நடைபெற்று வருகிறது. சில பகுதிகளில் பழைய
பணத்தாள்களை மாற்றிக் கொடுக்கும் கும்பல் சுற்றி வருகிறது.

இந்த நிலையில், திங்கள்கிழமை இரவு அரியலூரிலுள்ள
ஒரு தங்கும் விடுதியில் (லாட்ஜ்) தங்கியிருந்தவர்களிடையே
தகராறு ஏற்பட்டுள்ளது. இதுகுறித்து தங்கும் விடுதி ஊழியர்,
அரியலூர் காவல் நிலையத்துக்கு தகவல் தெரிவித்தார்.

ஆனால் போலீஸார் வருவதற்குள் அறையில் இருந்தவர்கள்
காரில் ஏறி தப்பிச் சென்றுவிட்டனராம்.

போலீஸார், விடுதியில் இருந்த கேமராவில் பதிவாகியுள்ள
காட்சிகளை பார்த்தபோது, ஒருவர் தனது பையில் வைத்திருந்த
ரூ. 34 லட்சம் பழைய பணத்தாள்களை கொடுத்து, புதிய
பணத்தாள் தருமாறு அந்த கும்பலிடம் பேரம் பேசுவதும்,
அந்த கும்பல், அந்த நபரிடமிருந்து ரூ. 34 லட்சத்தை பெற்றுக்
கொண்டு, புதிய நோட்டுகளை தராமல் ஏமாற்ற முயன்ற
போது தகராறு ஏற்பட்டு, அவசர, அவசரமாக காரில் ஏறி
செல்வதும் தெரியவந்தது,

சிறிது நேரத்தில் பணத்தை கொடுத்து ஏமாந்தவரும் மற்றொரு
காரில் சென்றது தெரியவந்தது.
இதைத் தொடர்ந்து, போலீஸார் வருகை பதிவேடுகளை ஆய்வு
செய்ததில், விடுதியின் 11-ஆவது அறையில் தங்கியிருந்தவர்
தஞ்சாவூரைச் சேர்ந்த கதிரவன் என்பதும், அவரைத் பார்க்க
வந்தவர்கள் கும்பகோணத்தைச் சேர்ந்தவர்கள் என்பதும்
தெரியவந்தது.

போலீஸார் விசாரணையில் தஞ்சையை சேர்ந்த கதிர், அருண்
மற்றும் அரியலூரைச் சேர்ந்த வினோத் உள்பட 5 பேர் மீது
வழக்குப் பதிந்துள்ளனர்.
-
--------------------------------
தினமணி