பணம் எடுப்பதற்கான கட்டுப்பாடு வரும் 30-ஆம் தேதிக்குப் பிறகும் தொடர வாய்ப்பு

மக்களின் தேவைக்கேற்ப புதிய ரூபாய் நோட்டுகளை ரிசர்வ் வங்கியும்,
பணம் அச்சடிக்கும் அச்சகங்களும் வெளியிட இயலாததால், வங்கிகள்,
ஏடிஎம் மையங்கள் ஆகியவற்றில் இருந்து பணம் எடுப்பதற்கான
கட்டுப்பாடுகள், வரும் 30-ஆம் தேதிக்குப் பிறகும் தொடர வாய்ப்பு
உள்ளதாகத் தெரிகிறது.

உயர் மதிப்புடைய ரூ.500, ரூ,1,000 நோட்டு வாபஸ் அறிவிப்புக்குப் பிறகு,
வங்கிகள் மற்றும் ஏடிஎம் மையங்களில் பொதுமக்கள் பணம் எடுப்பதற்குக்
கட்டுப்பாடு விதித்துள்ளது. வங்கியில் இருந்து வாரம் ஒன்றுக்கு
ரூ.24,000 வரையிலும், ஏடிஎம் மையத்தில் இருந்து நாளொன்றுக்கு
ரூ.2,500 வரையிலும் பணம் எடுக்கலாம் என்றும், இந்தக் கட்டுப்பாடு
50 நாள்களுக்கு, அதாவது, வரும் டிசம்பர் 30-ஆம் தேதி வரை நீடிக்கும் என்றும்
மத்திய அரசு அறிவித்திருந்தது.

ஆனால், அந்த அவகாசம் எப்போது தளர்த்தப்படும் என்று மத்திய அரசும்,
ரிசர்வ் வங்கியும் உறுதிபடத் தெரிவிக்கவில்லை.

மத்திய அரசின் 50 நாள்கள் அவகாசம் முடிவதற்கு இன்னும் சில தினங்களே
உள்ள நிலையில், வங்கிகளுக்குப் போதிய அளவில் புதிய ரூபாய் நோட்டுகள்
கிடைக்காத வரையில், வங்கிகளில் இருந்து பணம் எடுப்பதற்கான கட்டுப்
பாடுகள் தொடர வேண்டும் என்று பெரும்பாலான வங்கிகள் விரும்புகின்றன.

தற்போதைய நிலையில், வாரம் ஒன்றுக்கு ரூ.24,000 வரை எடுக்கலாம் என்று
அரசு அறிவித்துள்ள போதிலும் பணத் தட்டுப்பாடு காரணமாக,
பெரும்பாலான இடங்களில் தங்களுக்கு வரும் பணத்தின் அளவைப்
பொறுத்தே வாடிக்கையாளர்களுக்கு குறிப்பிட்ட தொகையை வங்கிகள்
பகிர்ந்தளித்து வருகின்றன.

இந்நிலையில், வரும் ஜனவரி 2-ஆம் தேதிக்குப் பிறகு வங்கிகளில் இருந்து
பணம் எடுப்பதற்கான கட்டுப்பாடுகள் முழுமையாகத் தளர்த்தப்பட்டுவிட்டால்,
தற்போதைய நெருக்கடியான சூழலில், பொதுமக்கள் கேட்கும் அளவுக்கு
வங்கிகளால் பணத்தைக் கொடுக்க இயலாது. எனவே,

""வங்கிகளில் இருந்து பணம் எடுப்பதற்கான கட்டுப்பாடுகள் முழுமையாகத்
தளர்த்தப்படக் கூடாது; பணப் புழக்கம் அதிகரித்தால் மட்டுமே கட்டுப்பாடுகள்
தளர்த்தப்படலாம்'' என்று பொதுத் துறை வங்கி ஒன்றின் மூத்த அதிகாரி ஒருவர்
கூறினார்.

மேலும், ""தற்போதைய சூழலில், தனிநபர்களுக்குப் பணம் கொடுப்பதற்கே
வங்கிகள் போராடி வரும் நிலையில், சிறு, குறு தொழில் நிறுவனங்களை
நடத்துபவர்களுக்கும், பன்னாட்டு நிறுவனங்களை நடத்துபவர்களுக்கும்
தேவைக்கு ஏற்ப பணம் கொடுக்க முடியாது; எனவே, பணம் எடுப்பதற்கான
கட்டுப்பாடுகளை படிப்படியாக தளர்த்துவதே நடைமுறைக்கு உகந்த வழியாகும்''
என்றும் அவர் கூறினார்.

புழக்கத்தில் இருந்த ரூ.15.4 லட்சம் கோடி மதிப்புள்ள நோட்டுகள் செல்லாது
என்று மத்திய அரசு அறிவித்த பிறகு, ரூ.12.4 லட்சம் கோடி மதிப்புள்ள நோட்டுகள்
வங்கிகளில் செலுத்தப்பட்டுள்ளன.

ஆனால், 5.92 லட்சம் கோடி மதிப்புள்ள ரூபாய் நோட்டுகளை மட்டுமே கடந்த
மாதம் 9-ஆம் தேதி முதல் டிசம்பர் 19-ஆம் தேதி வரையிலான காலகட்டத்தில்
ரிசர்வ் வங்கி வெளியிட்டுள்ளது.
-
-------------------------