காஷ்மீர் பனிச்சரிவு: ராணுவ வீரர்களின் பலி எண்ணிக்கை 14 ஆக உயர்வு

காஷ்மீர் பனிச்சரிவுகளில் சிக்கி பலியான ராணுவ வீரர்களின்
எண்ணிக்கை 14 ஆக உயர்ந்துள்ளது.

காஷ்மீரின் பந்திபோரா மாவட்டம், குரேஸ் பகுதியில் எல்லைக்
கட்டுப்பாட்டுக் கோடு அருகே புதன்கிழமை நள்ளிரவு இரண்டு
இடங்களில் திடீரென பனிச்சரிவு ஏற்பட்டது.

இந்த இரு பனிச்சரிவில் சிக்கி 10 வீரர்கள் பலியாகினர்.
4 பேர் மாயமானார்கள்.

இதையடுத்து அவர்களை மீட்கும் பணி தீவிரமாக நடைபெற்று
வந்தது. இந்நிலையில், மாயமான 4 ராணுவ வீரர்களின் உடல்கள்
இன்று காலை மீட்கப்பட்டுள்ளன. இதனால் பனிச்சரிவுகளில்
சிக்கி இதுவரை பலியானவர்களின் எண்ணிக்கை 14ஆக
உயர்ந்துள்ளது.

கடுமையான பனிப்பொழிவு காணப்படும் காஷ்மீர் பள்ளத்தாக்கில்,
கடந்த 3 நாள்களாகவே அவ்வப்போது பனிச்சரிவு ஏற்பட்டு
வருவதையடுத்து, மலைப்பாங்கான பகுதிகளில் அதிகாரிகள்
பனிச்சரிவு அபாய எச்சரிக்கை விடுத்துள்ளனர்.
-
-------------------------------
தினமணி