அமெரிக்காவில் இரவு விடுதியில் துப்பாக்கிச்சூடு: பலி எண்ணிக்கை 50 ஆக உயர்வு

by rammalar Mon Jun 13, 2016 7:35 pm

அமெரிக்காவில் ஓரினச்சேர்க்கையாளர்களுக்கான இரவு விடுதியில் பயங்கர துப்பாக்கிச்சூடு நடந்தது. இந்த சம்பவத்தில் 50 பேர் உயிரிழந்துள்ளதாக தகவல்கள் வெளியாகி உள்ளது.

அமெரிக்காவில் புளோரிடா மாகாணத்தில் ஆர்லண்டோ நகரில் ‘பல்ஸ்’ என்ற பெயரில் ஓரினச்சேர்க்கையாளர்களுக்கான இரவு விடுதி செயல்பட்டு வந்தது. அந்த விடுதியில் நேற்று இரவு விடிய, விடிய கேளிக்கை கொண்டாட்டங்கள் நடைபெற்றன. இதில் 100–க்கும் மேற்பட்டவர்கள் கலந்து கொண்டிருந்தனர். இன்று அந்த விடுதிக்கு வந்த மர்ம நபர் ஒருவர், விடுதியில் இருந்தவர்கள் மீது கண்மூடித்தனமாக துப்பாக்கிச்சூடு நடத்தினான்.இந்த துப்பாக்கிச்சூட்டில் 50 பேர் பரிதாபமாக இறந்தனர்.53 பேர் படுகாயமடைந்துள்ளனர்.

தகவலறிந்து மூன்று மணி நேரத்திற்கு பின்னர் சம்பவ இடத்திற்கு வந்த போலீசார்,அந்த மர்ம நபரை சுட்டுக்கொன்றனர்.துப்பாக்கிச்சூடு நடத்திய மர்ம நபரின் பெயர் ஆப்கானிஸ்தான் வம்சாவளியைச் சேர்ந்த ஓமர் எஸ் மடீன் எனவும் அவன் ஐ.எஸ் அமைப்பை சேர்ந்தவனாக இருப்பான் என சந்தேகிப்பதாகவும் போலீசார் தெரிவித்துள்ளனர்.

அமெரிக்க வரலாற்றில் துப்பாக்கிச்சூட்டின் மூலம் அதிக நபர்கள் படுகொலை செய்யப்பட்டிருப்பது இதுவே முதல்முறையாகும். இதற்கு முன்னர் 2007-ஆம் ஆண்டு விர்ஜினியா பல்கலைகழகத்தில் 32 பேர் படுகொலை செய்யப்பட்டதே இது வரை அதிகபட்சமாக இருந்தது.

அமெரிக்காவில் தொடர்ந்து துப்பாக்கி தாக்குதல்கள் பெருகி வருவது மக்களை பதற்றத்தில் ஆழ்த்தி உள்ளது.
-
தினத்தந்தி